Link açıqlığı

Qırımtatarlarnıñ liderleri Kyivde Türkiye medeniyet ve turizm naziri ile körüştiler


Mustafa Cemilev ve Refat Çubarov Dünya qırımtatar kongressinde, arhiv fotoresimi

Kyivde mart 30-da Qırımtatar Milliy Meclisiniñ reisi Refat Çubarov ve qırımtatarlarnıñ lideri Mustafa Cemilev Türkiye medeniyet ve turizm naziri Mahir Ünal ile körüştiler.

Mustafa Cemilev Qırım.Aqiqatqa izaat berip, bu körüşüvni «nezaket ziyareti» dep adladı ve ayrı meseleler baqılğanını bildirdi.

«Türkiye medeniyet ve turizm nazirligi öz saasında ne yapa bile, onı laf ettik. Kyivdeki Qırım eviniñ tamir işlerinde yardımcı olacağını ayttılar. Ve nazirlik kiril urufatından latincege (qırımtatar tiliniñ – QA) keçmek içün neler yapacağını laf ettik», – dep qayd etti Cemilev.

Ukraina prezidentiniñ qırımtatar halqı işlerinden vekâletlisi Mustafa Cemilevniñ ofisi Ukraina medeniyet nazirligine muracaat etip, memlekette qırımtatarcanıñ latin urufatında qullanmasını kirsetmek ricasını aydınlattı.

Malüm ki, 2014 senesi mart ayında Rusiye Qırımnı işğal etken soñ yarımadada qırımtatar tiliniñ kiril urufatından latincege keçüv meselesi toqtatıldı. Rusiye Federatsiyasında bütün devlet tilleriniñ elifbesi kiril urufatına esaslanacaq («Rusiye Federatsiyası halqlarınıñ tilleri aqqında» qanun, «Tillerniñ uquqiy vaziyeti» 3-ünci madde, 6-ncı noqta). Diger urufatnı yalıñı Rusiye qanunları belgiley bile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG