Rusiyege boysunğan işğal etilgen Qırım politsiyası bildire ki, bir yıldan berli ğayıp olğan Fedor Kostenko qıdırıla. O, yarımadada mahküm etilgen Euromaydan faali Aleksandr Kostenkonıñ babası ola.
Politsiyanıñ faalniñ anası Yelena Kostenkoğa yollağan mektüp-cevabını qorantanıñ adliyecisi Dmitriy Sotnikov Facebookta numayış etti.
«Haber etemiz ki, arizañız baqıldı, eski ömür arqadaşıñız Kostenko Fedor Stepanoviç Aqmescit boyunca Rusiye İçki işler nazirliginiñ OP №2 «Kiyevskiy» idaresinde... 16.03.2015 senesinden başlap onıñ ğayıp olmasınen bağlı qıdıruv işleri keçirilmekte», – dep aytıla mektüpte.
Euromaydannıñ Qırım faali Aleksandr Kostenkonıñ babası Fedor Kostenko 2015 senesi mart ayında ğayıp oldı, o, oğlunıñ Qırımdaki işinde büyük bir rol oynay. Adliyeciniñ aytqanına köre, Fedor Kostenko daireni baqmağa izin bergen edi, Aleksandr Kostenko qabaatında qayd etilgen silâ parçası anda tapıldı.
Faal apiske alınğan soñ babası Kiyevge ketti, amma daa bir tintüv aqqında haber alğanınen acele qaytmağa mecbur oldı. Er kişi Qırımğa kirgende onıñnen bağ üzüldi.
Dmitriy Sotnikov bildirdi ki, Fedor Kostenko oğlu nasıl qaçırılğanını körgen edi.
Qırımda Aleksandr Kostenko dört yıl ve eki ayğa qadar apiske alındı. Taqiqat malümatına köre, 2014 senesi fevral 18-de Kiyevdeki «kütleviy çatışmalar» vaqtına Kostenko «Berkut» mahsus bölüginiñ hadimlerinden birine zarar ketirdi.
Kostenko qabaatını tanımadı. 2016 senesi fevral soñunda Rusiyege boysunğan Qırım Yüksek mahkemesiniñ prezidiumı Kostenko imayesiniñ kassatsion şikâyetini baqıp qarar çıqardı – «mahkeme senetlerini deñiştirmemek, 3 yıl 6 ay apis cezasını bermek».
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
