Link açıqlığı

Milliy şura «Millet» Qırım telekanalınıñ uydu vastasınen yayınlağanını qanunğa riayet etüv ceetinden teşkerecek – Ceppar


Ukraina teleradio yayın meseleleri milliy şurası «Millet» Qırım telekanalınıñ (Kremlge boysunğan Qırım akimiyeti tarafından «Cemaat qırımtatar teleradiokompaniyası» olaraq adlandırılğan) uydu vastasınen Ukrainada yayınlamasınıñ qanunğa riayet etkenini teşkerecek.

Bunı Ukraina haber siyaseti naziriniñ Qırım işlerinden vekâletlisi Emine Ceppar Qırım.Aqiqatqa bildirdi.

«ABS uydusına kirsetilgen ekinci Qırım telekanalı (birincisi – «Krım 24»). Ukraina teleradio yayın meseleleri milliy şurası uydu kimge ait olğanını ögrenmekte. Avropa, Amerika uydusı olsa – yayın Qırım kompaniyalarına qarşı kirsetilgen cezalardan sebep yasaq etilecek», – dep qayd etti o.

Kremlgen boysunğan Qırım akimiyeti bildire ki, aprel 1-den başlap «Millet» Cemaat qırımtatar teleradiokompaniyası Rusiye Federatsiyası ve yaqın çetelde uydu vastasınen yayınlaycaq. Yarımadanıñ şimdiki akimiyeti tizgen planlarğa köre, «Millet» Ukraina, Türkiye, Orta Asiya ve Şarqiy Avropada yayınlaycaq.

2015 senesi avgust 10-da Roskomnadzor «Millet» telekanalı ve «Vatan sedası» radiosını kütleviy haber vastaları olaraq qayd etti. «Millet» akimiyetke qoltutqan TRK «Krım» («Pervıy krımskiy») Seyran Mambetov yolbaşçılıq yapqan qırımtatar ve milliy yayınları bölügi esasında quruldı.

2016 senesi fevral ayında Ukraina teleradio yayın meseleleri milliy şurası Ukraina Mudafaa ve Milliy havfsızlıq şurasına muracaat etip, Rusiye Federatsiyasınıñ 38 şirketine qarşı ceza kirsetmege rica etti. Cedvelde – Rusiye kanalları, em de Qırım ve Aqyarda yayınlağan ve Roskomnadzor qayd etken telekanallar. Cedvelge «Cemaat qırımtatar teleradiokompaniyası» («Millet», «Vatan sedası») da kirdi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG