Makeme oturışında qullanılıp başlağan videokonferentsiya, mabüslerniñ çıqışlarını üzüp, köstermemege imkân bere. Rusiye nezareti astında bulunğan Qırım Yuqarı Makemesi öz tarafından bunıñnen sebeplendi. Böyle fikirni Qırım.Aqiqat agentligine Ahtem Çiygoznıñ advokatı Nikolay Polozov bildirdi.
Mart 29 künü, Qırım makemesi «fevral 26» işi boyunca mabüsleriniñ qapatılmasına qarşı appelâtsiyanı baqtı. Bu oturışlarda Ahtem Çiygoz, Ali Asanov ve Mustafa Degermenci olmadılar. Polozov bunı böyle izaatladı:
«Añlaşılğanına köre, makeme öz aqlarını suistimal etmekte, menimce, bu, keçken oturışta Çiygoznıñ çıqışına bir reaktsiyadır. Çünki bilemiz, onıñ sonki sözü ğayet sert edi. Videokonferentsiya rejimi kerekli vaqıtta çıqışta bulunğannıñ sesini yavaşlatıp, bağnı kesmege imkân bere. Onıñ içün bu yañı format seçildi», - dep ayttı Polozov.
Onıñ sözlerine binaen, umumen alğanda böyle qarar, taqiq izolâtorı makemeden uzaq bir yerde yerleşse, protsessniñ qıtması içün qullana bile.
«Amma mında, SİZOdan Makemege qadar üç daqqalıq yol bar. Bu sebepten vaziyetni makeme aqlarını suistimal etkenlerinen bağlayım», - dep qayd etti advokat.
Onıñ haber etkenine köre, makemeniñ nevbetteki oturışları aynı videokonferentsiya rejiminde keçirilecek. Bu aqta makemeciler mart 29 künü oturış devamında bildirdiler.
Polozovnıñ qaydlarına binaen, Rusiyede oturuşlarnıñ mezkür şekili itirazlar baqılğanda qullana. Bunıñnen bir sırada «fevral 26» işiniñ oturışları mabüslerniñ iştiragı ile keçecek.
Rusiye nezareti astında bulunğan Qırım Yuqarı Makemesi, mart 29 künü mabüsleriniñ menfaatını qoruğan itiraz arizalarını baqacaq edi, faqat oturış tenefüsini aprel 6 ve 7 künlerine qadar uzatmağa qarar aldı.
Mart 24 künü Rusiye nezareti astında bulunğan Qırım Yuqarı Makemesi, Qırım prokuraturasınıñ appelâtsiyasını qabul etmedi. Belli ki, prokuratura, mabüslerge qabaatlayıcı ükümni çıqarmaq içün, cinaiy işni makemege qaytarmağa talap etti. Bunıñnen bir sırada, Qırımdaki makeme «fevral 26» işiniñ mabüslerini aprel 24 kününe qadar apiste qaldırdı.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksyonov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
