Mart 27 künü, YouTube kanalında qırımtatar milliy Meclisiniñ yolbaşçısı muavini Ahtem Çiygoznıñ çıqışı yazılması peyda oldı. Belli olğanı kibi, onı Çiygoz mart 24 künü Qırım Yuqarı Makemesiniñ oturışı devamında yaptı. Mezkür çıqışta Çiygoz, er kesni qanunğa riayet etmege çağırdı.
«Apiste bulunır ekenim, şu cinaiy işiniñ manasızlığını añlayım, epiñizni qanunğa riayet etmege çağıram. Men qanunğa işanğanım içün degil. Makemeciler, prokuratura, taqiqat - episi siyasetçilerge tabiy olğanlarını bilem. Epiñiz, olar aytqan qararlarını alacaqsıñız», - dep ayttı o.
«Siz qanunnı riayet etmege ant ettiñiz, sizni buña çağıram. Er biriñiz öz seviyeñizde qanunlarını bozıp başlasa, bizim balalarımıznıñ kelecegi olmaycaq. Tek qırımtatar balaları aqqında aytmayım... », - dep qayd etti Çiygoz.
O, kene Qırımdan iç bir yerge ketmeycegi aqqında hatırlatıp, «ölümden qorqmağanı»nı ayttı.
«Amma men ruhtan tüşmeycem, böyle tertipsizlikke qarşı turacam», - dep qoştı Çiygoz.
Video: Alim Aydamak
Mart 24 künü Rusiye nezareti astında bulunğan Qırım Yuqarı Makemesi, Qırım prokuraturasınıñ appelâtsiyasını qabul etmedi. Belli ki, prokuratura, mabüslerge qabaatlayıcı ükümni çıqarmaq içün, cinaiy işni makemege qaytarmağa talap etti. Bunıñnen bir sırada, Qırımdaki makeme «fevral 26» işiniñ mabüslerini aprel 24 kününe qadar apiste qaldırdı.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksyonov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
