Link açıqlığı

Ukrainadaki Avropa Şurasınıñ vekâlethanesi: ukrain pasportları olğan qırımlılarğa şengen vizalarınıñ alınmasında sıñırlama olmaycaq


Ukrainadaki Avropa Şurasınıñ vekilliliginde haber etkenleri kibi, Ukraina vatandaşları olğan qırım sakinleri, şengen vizanı almaq içün, serbest ariza yaza bileler, iç bir sıñırlama ya da problem olmaycaq. «Mında şengen zonasına kirgen bütün devletler aqqında söz yürütilmekte», - dep qayd ettiler hızmette.

«Qırımlılar, şengen vizanı almaq içün, Ukrainada yerleşken elçihanelerge ariza yaza bileler. Bunı yapmaq içün esasiy Ukrainağa kelmeleri kerek olacaq», - dep qayd etti Ukrainadaki AŞ-nıñ matbuat kâtibi David Stulik Qırım.Aqiqat agentligine.

Onıñ izaatlarına köre, Qırım sakinleri içün, şengen vizalarınıñ alınması Ukraina vatandaşı pasportı esasında kerçekleştirilecek.

Onıñ bildirgenine köre, Qırım Rusiyenen işğal etilgen soñ, yarımadada berilgen vesiqalar kerçek olarak qabul etilmey.

«Biz Qırımnıñ işğalini qabul etmeymiz...Qırım Ukrainanıñ bir qısmıdır. Qırımlılarnıñ işğalden soñ alınğan vesiqalar esasında yazılğan arizaları qabul etilmeycek», - dep ayttı David Stulik.

Keçken aftadan başlap, esasen rusiye matbuat vastaları, Moskvadaki Yunan Cumhuriyetiniñ baş elçisiniñ sözlerine esaslanıp, Yunanistan, Avropa Şurasınıñ sanktsiyalarına qol tutqanı içün, qırımlılarnı özülerinde qabul etmeycegi aqqında aytmaqta.

Keçenleri, Ukraina Adliye Nazirligi, Kiyevni atlap, Moskva şeherinde, qanunsız şekilde şengen vizalarını yaptıracaq olğan adamlardan tenbiyeledi.

2015 senesiniñ yazında Rusiye Tışqı İşler Nazirligi, Avropa Şurasına kirgen devletlerni qırımlılarğa qarşı «Vizalı cenk» başlağanlarında qabaatladı.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG