Mart 24 künü, Ukraina prezidentiniñ resmiy saytında elektron petitsiya peyda oldı. Oña köre, Rusiye Federatsiyası tarafından Keriç köprüniñ qurulmasını toqtatmağa muracaat etile.
Petitsiya müellifi halqara aq-uquqları ve gemilerniñ umumiy territoriyası aqqında aytmaqta. Mart 25 kününiñ üyle vaqıtına kerekli 25 000 reylerden 32 toplanıldı.
Elektron petitsiyaları boyunca qanunğa köre, Ukraina prezidentine, akimiyetke ya da parlamentke yollanılğan muracaat, basılğan kününden başlap, üç ay içinde, vatandaşlarnıñ eñ azı 25 000 reyini toplamaq kerek.
Eger petitsiya kerekli reylerni toplasa, o, 10 iş kün içinde baqılacaq.
Ukraina prezidentiniñ saytında Petitsiyalar bölügi 2015 senesiniñ avgust ayından başlap, çalışıp başladı.
2016 senesi mart 18 künü, Rusiye prezidenti Vladimir Pütin Keriç köprüniñ qurulışı ketişatınen tanış olmaq içün, işğal etilgen yarımadağa kelgen edi.
Keriç boğazından köprüniñ qurılması kerekligi aqqında Pütin, ta 2014 senesi, işğalden soñ aytqan edi. Köpür leyhasınıñ baş podrâdçigi «Stroygazmontaj» şirketi oldı. Keriç boğazından keçecek köpürni 2018 senege qurmağa vade etmekteler.
Ukraina Rusiyenen Keriç köprüniñ qurulışı ile bağlı añlaşmadan 2014 senesi, Rusiye Qırımnı işğal etken soñ çıqtı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
