Rusiye nezareti astında bulunğan Qırım prokurorı Natalya Poklonskaya bildirgeni kibi, onıñ hızmeti eñ qısqa vaqıtta «fevral 26» işi boyunca eksikliklerni yoq etip, onı tekrar makemege yollaycaqlar.
Bu aqta o, «TASS» rusiye agentligine, mart 24 künü makeme tarafından çıqarılğan qararnı izaatlağanda tarif etti.
«Biz eñ qısqa müddet içinde, makeme aytqan eksikliklerni yoq etermiz. Bu iş menim nezaretim astında yapılacaq. Soñra ise işni muakeme etilmesi içün makemege yollarmız. Makeme köstergen hatalarnı oturış devamında da yoq etmege mümkün edi. Bular özüne çoq vaqıt talap etken hatalar degil», - dep ayttı Poklonskaya.
Onıñ sözlerine köre, qabaatlayıcı yekün üzerinde iş soñuna qadar keçirilecek, bazı sözler deñiştirilecek.
Rusiye nezareti astında bulunğan Qırım Yuqarı Makemesi mart 24 künü keçirilgen oturışta, qusurlar sebebinden cinaiy işni prokuraturağa qaytarmaq qararını aldı. Poklonskaya makeme oturışında yoq edi.
Bunıñnen bir sırada, Qırımdaki makeme «fevral 26» işiniñ mabüslerini aprel 24 kününe qadar apiste qaldırdı.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksyonov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.
Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
