«Krım SOS» cemaat teşebbüsinde tüşüngenleri kibi, eñ büyük problema ve halqara bozuvları, yarımada «Rusiyeniñ arbiy adaları»nıñ birine beñzep başlağanında saqlıdır.
Bu aqta, «Krım SOS» cemaat teşebbüsiniñ yolbaşçısı muavini Yevgeniya Andriyuk bildirdi.
Onıñ sözlerine binaen, soñki vaqıtları, Qırım yarımadasına pek çoq arbiy tehnika kirsetilgen.
Onıñ qaydlarına köre, yerli sakinlerniñ eyforiyası da közü qaytmasına deñişti.
«Qırımlılar angi devlette yaşamaq meselesine daima pervasız ediler. Eger Ukrainanen yahşı olsa - demek Ukraina, eger Rusiyenen yahşı olsa, demek Rusiye», - dep ayttı «Krım SOS» cemaat teşebbüsiniñ teşkilâtçısı Tamila Taşeva.
Qırım işğal etilgen soñ, Rusiye yarımada territoriyasında er daim bir - de - bir arbiy talim keçirmekte.
OONnıñ Ukrainadaki daimiy vekili Vladimir Yelçenkonıñ qaydlarına köre, Qırımnıñ militarizatsiyası tek Qara deñiz regionı degil, başqa devletler içün de telükeli ola bile.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
