Qırımtatar milliy areket iştirakçisi Sadıq Berberovnıñ aytqanına köre, Kreml nezareti asıtnda bulunğan qırım akimiyeti eki yıl evel topraqlarnı resmiyleştirmege vade etti, amma buña baqmadan, şimdi qırımtatarlarnı evlerniñ yıqtırmasınen qorqutmağa devam eteler. Bu aqta Berberov Qırım.Aqiqat radiosınıñ yayınıda bildirdi.
«Qırımda böyle tedbirlerge çoqtan azırlanalar, olar (qırım akimiyeti) böyle areketlerni kerçekleştirecekleri aqqında aytqan ediler. Bu qorqutuvlar bu künge qadar devam ete. Eñ başında, topraqnen bağlı bütün meseleler qırımtatarlar içün müsbet tarafından çezilecegi aqqında aytılğan edi, amma eki yıl keçken soñ biz, meseleler çezilmegenini, qırımtatarlar ise topraqlarnı resmiyleştirip olamaycaqlarını köremiz», - dep ayttı qırımtatar faali.
Öz nevbetinde qırım uquq qoruyıcısı Jan Zapruta topraqnen bağlı davalı meselelerni makemeniñ yardımı ile çezmege teklif ete.
«Prokuraturağa yazmağa, makemege muracaat etmege, makeme mudafaasını qıdırmağa, bu areketlerni qanunsız olaraq tanımağa kerek. Asılında, Qırımda böyle tedbirler amelde rast kele, olarnıñ arasında atta müsbet çezilüvler de bar. Şer şurasınıñ qararı lâğu etile bile. Amma bu meseleler uquqiy taraftan çezilmek kerek», - dep ayttı Zapruta.
Evel haber etilgeni kibi, mart 23 künü Sudaq şeherinde qırımtatarlarnıñ 6 tane evleri ve bazarı yıqtırılacaq edi. Alçaq massivine qırımtatarlarnıñ evlerni yıqtırmaq içün, 100 - ge yaqın silâlı uquq qorçalayıcılar keldi. OMOn ve makemeciler bir qaç saatten soñ massivni terk ettiler. Yerli akimiyet qırımtatar evleriniñ saiplerine kompromiss variantını teklif etti, evler yer yüzünden silingenini istemeseler, on kün içinde 76 mln. ruble ödemek kerekler ya da binalar mecburen yıqtırılacaq.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
