Link açıqlığı

Saatnıñ esas haberi

Polozovnıñ fikirince, «fevral 26» işini «parçalay» bileler


Qırımda «fevral 26» işiniñ baqılmasını bir qaç protsesslerge bölip, Meclisni eksteremistik teşkilâtı olaraq tanılması boyunca işinen birleştire bileler.

Bu aqta Qırım.Aqiqat agentligine Ahtem Çiygoznıñ advokatı Nikolay Polozov bildirdi.

«Cinaiy işni tekrar taqiqatqa yollaylar. Fikirimce, olar Meclisni ekstremistik teşkilâtı olaraq tanılması boyunca işni bu işnen eşleştirmek isteyler. Belki de, bazılarğa ekstremistik faaliyeti boyunca maddeler qoşulacaq. Ve añlaşılğanına köre, ketişatnıñ iştirakçileri çoq olğanı sebebinden, bu protsess, bir qaç parçalarğa bölünecek. İş devamında peyda olğan muracaatlar sebebinden, taqiq aman-aman areket etmey, olar içün böyle şaraitlerde çalışmağa ğayet qıyındır. Büyük işni kiçkene parçalarğa bölseler, ekişer adam muakeme eterler», - dep ayttı o.

Advokatnıñ tahminlerine köre, Qırım akimiyeti, mezkür iş boyunca mabüsler miqdarını keñleştirmek istey.

Mart 24 künü Rusiye nezareti astında bulunğan Qırım Yuqarı Makemesi, Qırım prokuraturasınıñ appelâtsiyasını qabul etmedi. Belli ki, prokuratura, mabüslerge qabaatlayıcı ükümni çıqarmaq içün, cinaiy işni makemege qaytarmağa talap etti. Bunıñnen bir sırada, Qırımdaki makeme «fevral 26» işiniñ mabüslerini aprel 24 kününe qadar apiste qaldırdı.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksyonov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar.

Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi.

Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG