Ukrain sıñırcıları ile beraber Qırım sıñırında nevbette turmaq içün, «Asker» birleşmesiniñ faalleri mahsus sınav tapşırdı. Onıñ neticesinde 60 faalden 33 - çı sınavnı keçti. Bu aqta Qırım.Aqiqat agentligine Ukraina sıñır hızmetiniñ spikeri Öleg Slobodân bildirdi.
Onıñ sözlerine binaen, bütün faaller «Kalançak», «Çaplınka» ve «Çongar» keçici noqtalarında taqsim etilecek. Olar, eñ yaqın zamanda vazifelerini eda etip başlaycaqlar.
Slobodânnıñ qaydlarına köre, «Asker»niñ faalleri nezaret hızmetleriniñ işlerine kirişmeycekler.
«Olar mesleat etecekler. Qırımnen memuriy sıñır noqtalarında nezaret hızmetleriniñ işlerine kirişmege aqları olmaycaq. Bunıñnen bir sırada olar, vesiqa ve ya yüklerni teşkermeycekler. Olar, tek bir de bir şey boyunca tevsiye ete bilecekler», - dep ayttı Slobodân.
Bundan evel, Qırım blokadası boyunca aktsiya yolbaşçısı Lenur İslâmov bildirgeni kibi, grajdan faaleri Qırımnen sıñırda ukrain qanunları boyunca çalışmalarını nezaret etecekler.
«Asker»- niñ faalleri haber etkeni kibi, blokadanıñ yañı formatına keçmek içün olar, sıñırcılarnen umumiy işni alıp baracaqlar.
2015 senesiniñ sentâbr 20 qırımtatarlarnıñ teşebbüsi ile, Qırım sıñırından keçken aşaiyt mallarınen tolu olğan yük maşnalarnıñ müddetsiz blokadası teşkil olunğan edi.
2016 senesiniñ yanvar ayında Qırım blokadası boyunca aktsiya öz formatını deñiştirdi. Blokada iştirakçileri ukrain sıñırcıları ve «Asker» adlı birleşmenen beraber umumiy areketlreni teşkil etmege planlaştıralar.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
