Link açıqlığı

Rusiye nezareti astında bulunğan Qırım akimiyeti yarıqnıñ qoşma sıñırlaması aqqında tenbiyelediler.

Memuriy organları idaresiniñ reisi Andrey Domanitskiy bildirgeni kibi, yarıq eñ çoq mart 24, 25 künleri kesilecek. Bu künleri şeher boyunca tek 105 MVt berilecek.

Böyle vaziyetniñ sebeplerini plan boyunca keçirilgen elektrik ağlarnıñ tamir işlerinen izaatlaylar.

«Fevqulade vaziyetler boyunca ştabnıñ qararı ile, elektrik naqliyatınıñ areketi de qısqartılacaq. Marşrutqa tek 10 maşna çıqacaq. Bunıñnen bir sırada, qazanlarnıñ çalışmaları sıñırlanacaq, olar tek gece saatlerinde yaqacaqlar, yollarnıñ havflı yerlerinde yarıq qulleleri qoyulacaq», - dep ayttı memur.

Berilgen malümatlarğa köre, Aqyar şeherinde energolimiti 130-140 MVt - qa qadar tüşecek.

Qırım energo qıtlığı ve kütleviy şekilde yarıqnıñ kesilmesi vaziyetinde dört ay devamında yaşamaqta.

Yarıqnıñ aktiv kesilmesi keçken afta başlandı. Rusiye nezareti astında bulunğan Qırım akimiyeti, böyle vaziyet elektrik ağlarda yapılğan tamir işleri ile bağlı olğanı aqqında ilân ettiler.

Söndürüv cedveli mart 26 kününe qadar çalışacaq.

2015 senesiniñ dekabr 30 kününden başlap, Ukrainadan Qırımğa elektrik energiyasınıñ kelmesi toqtatıldı. Bugünki künde Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energo köpüriniñ yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG