Link açıqlığı

Herson vilâyetiniñ Novoalekseyevka köyüniñ sakinleri Rustem ve Bekir Gugurikler, 2021 senesine qadar Qırımğa kiriş yasağını elde ettiler. Mezkür vesiqanı olarğa memuriy - keçici noqtada berdiler. Belli olğanı kibi, yigitler mart 18 künü Qırımğa kelecek ediler.

Rustem Gugurik Qırım.Aqiqat agentligine bildirgeni kibi, olarğa ecnebiy vatandaşı ya da vatandaşlığı olmağan şahıslarğa kibi, «Rusiyeden çıqış ve kiriş tertibi ile bağlı» Qanun maddesine köre, 2021 senesi yanvar 1 kününe qadar Qırım yarımadasına kirmege yasaq etilgen.

«Mart 18 künü kete edim, pasport kontrolini keçkende, meni kene toqtattılar. Kabinetke davet etip, kâğıtlarnen tanış olmağa ve imza atmağa teklif ettiler, bundan soñ meni kene Ukrainağa yolladılar. Men izaatnı talap ettim, olar ise, er şey kâğıtta yazılğanı aqqında ayttılar. Men sakinler içün telüke ketire ekenim. Nasıl telüke ve kimni qorquzğanımnı bilmeyim. Bütün soy-soplarım Qırımda qalğan, men ise endi anda barıp olamayım. Bugün olar barlar, yarın yoq, men ise cenazege bile barıp olamaycam», - dep tarif etti Rustem Gugurik.

Onıñ bildirgenine köre, 2016 senesiniñ yanvar ayından başlap, Qırımğa er seferinde ketkende, onı sıñırda toqtap sorğulay ediler. Hususan, Qırım grajdanlıq blokadasına ait olğanı aqqında soramaqta ediler. Gugurikniñ qaydlarına köre, o, öz noqta-i nazarını saqlamağan, bunıñnen bir sırada FSB hadimleri aktsiyada iştirak etkeninen bağlı delillerni elde etkenler.

Ukraina informatsion siyaseti nazirliginde bildirgenleri kibi, soñki bir qaç kün içinde Qırımğa keçmesinen bağlı yasaq vesiqalarnı üç qırımtatarı alğan. Bular: Rustem ve Bekir Gugurikler, Bilâl Seytumerovdır. Ukraina informatsion nazirliginiñ yolbaşçısı mesleatçısı Emine Ceppar, Qırım.Aqiqat agentligine haber etkeni kibi, kerekli organlarğa muracaat etildi, amma Qırım işğal etilgen yer olğanı sebebinden, vaziyetni deñiştirip olamaylar.

«Belli reaktsiya olması içün, biz şimdi Ukraina Baş prokuraturasına, Telükesizlik hızmetine muracaatlar yazmaqtamız. Amma vaziyetni deñiştirip olamaycağımıznı añlaymız, çünki Qırım işğal etilgen. Eger adam bu kibi vesiqalarnı elde etse, o, yarımadağa kirip olamaz. Şimdi biz bu aqta aktiv şekilde aytmaq kerekmiz, matbuat vastalarına, halqara teşkilâtlarnıñ uquq qoruyıcılarına - er keske bildirmek kerekmiz», - dep ayttı nazir mesleatçısı.

2014 senesinde Qırım Rusiye tarafından işğal etilgen soñ, Rusiye akimiyeti Qırımğa keçmek yasağını dört şahıslarğa qarşı ilân etti, olarnıñ arasında qırımtatar halqınıñ liderleri Mustafa Cemilev ve Refat Çubarov, qırımtatar milliy areket iştirakçileri İsmet Yüksel ve Sinaver Kadırov olğanlar. Qırımda, hususan, mayıs 3 künü Mustafa Cemilevni Qırım sıñırında qarşılağanları içün, 150 - ge yaqın qırımtatarı rusiye makemelerinen cezalanğan.

Rusiye uquq qorçalayıcılarnıñ resmiy izaatları yoq. Qırımdaki Rusiye FSB hızmetiniñ saytında, bir - de - birge yarımadağa kirmek yasağı aqqında malümat berilmey.

Qırım Rusiye tarafından işğal etilgen soñ, 2014 senesiniñ başında esasiy Ukraina ve Qırım arasında resmen memuriy, asılında ise kerçek «sıñır» belgilendi.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG