Qırımdaki riyeltorlarnıñ bildirgenlerine köre, yarımadada mülkni satın almağa istegen rusiyelilerniñ sayısı çoqtır. Amma, yerli sakinler er bir metre kareni palıca satmağa tırışqanları içün, qırım mülküniñ fiatları yüksektir.
«Alliance De Luxe» şirketiniñ Qırım ofisinde qayd etkenleri kibi, Rusiyeniñ çeşit regionlarında yaşağan adamlar, yarımadanıñ mülkünen pek meraqlanalar. Bu sırada birinci yerni Aqyar şeheri almaqta. «Rusiye regionlarınıñ sakinlerini qırım mülkü daha çoq Qara deñiz içün celp etmekte. Bu alış - verişiniñ eñ müim faktorıdır».
Ekseriy allarda, mülkni elde etmege istegenler Rusiyeniñ farqlı köşelerinde yaşağanlardır. İşğal sebebinden yarımadada yüz bergen problemlerni ve vaziyetni köz ögüne almayıp, rusiyeliler büyük paralarnı yatırmağa azırlar. Yerli riyeltorlarnıñ sözlerine binaen, qırımlılar mülkni dollarlarğa satmağa tırışalar.
Qırım blogerı Alöna Bardovskayanıñ qaydlarına köre, Aqmescitte bir odalı, 40 metre kareli kira 2,7 mln rubleni teşkil etecek. Aqyarda aynı kira 3,5 mln ruble olacaq, Yaltada aman-aman 4 mln rubleni teşkil etecek. Bunıñnen bir sırada, mülkniñ fiatları ne yarımadadaki infrastrukturasına, ne de yerli maaşlarğa uymamaqta.
«Rusiye regionları arasında, paalı mülk saasında, Qırım Moskvadan soñ ekinci yerni almaqta. Onıñ içün Qırımğa köçmege isteseñiz, mülk ucuz olmağanı, maaşlar ise moskavadaki kibi olmağanını unutmañız. İnfrastruktura baqımsız olğanı içün, fiatlar yüksektir», - dep ayttı Bardovskaya.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
