Link açıqlığı

Rusiye tarafından işğal etilgen Qırımda yarıq söndürülmesiniñ eski cevdveline qayttılar.

Qırım.Aqiqat agentligine berilgen malümatlarğa köre, böyle rejimde yarıqnıñ kesilmesi mart 19 kününden Aqmescit, Kezlev, Saq rayondarında başlandı. Soñki kere böyle söndürüvler Qırımda qışta kerçekleştirilgen edi.

Belli olğanı kibi, elektrikniñ kesilmesi Kubandan Qırımğa keçirilgen energo köpürniñ yarıq limitleri qısqartılğanı sebebinden yüz berdi.

Cumaertesi künü yarıqnı Aqyar şeerinde de kesip başladılar. Şeerde toqtamayıp, generatorler çalışmaqta.

Keçenlerde, Qırım akimiyeti tenbiyelegeni kibi, baş elektro ağlarda tamir işleri başlağanı sebebinden, mart 19-26 künleri Qırım boyunca yarıq daa sıq kesilecek.

2015 senesiniñ dekabr 30 künü, Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta, Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.

Bugünki künde Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energo köpüriniñ yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG