Rusiye nezareti astında bulunğan Qırım Yuqarı Makemesi, Meclisniñ faaliyeti yasaq etilüvinen bağlı makeme oturışını aprel 7 kününe keçirdi. Ba aqta Feysbuk saifesinde Cemil Temişev bildirdi.
«Memuriy işnen ve qoşma vesiqalarnen tanış olğan soñ, Qırım Cumhuriyeti Prokurorınıñ talapları qanunsız olğanı, belgilengen fikir ise, isbatlanmağanı ve tasdıqlanmağanını qayd etmek isteyim. Memuriy davacınıñ neticeleri işniñ kerçek sebeplerine uymay», - dep qayd etti advokat.
Onıñ hatırlatqanına köre, uquq qaideleri boyunca, hususan 1989 senesi Halqara emek teşkilâtınıñ baş Konferentsiyasında qabul olunğan 169 nomeralı Konventsiyada, tamır halqlar öz urf - adetlerini ve temsil institutlarıni saqlay bileler, bunıñnen bir sırada tamır halqlarınıñ degerliklerne toqunmamazlıqnıñ ürmet etüvi belgilengen.
Aynı uquq Birleşken Milletler Teşkilâtınıñ deklaratsiyasında keçmekte. O, 2007 senesi baş Assambleyasınıñ 61/295 rezolütsiyasına köre qabul olunğan edi.
Temişevnıñ fikirince, qırımtatar Milliy Meclisi cemaat birleşmesi olmağanı içün, bu makeme protsessinde cevap berici olaraq çıqamaz .
Rusiye nezareti astında bulunğan Qırım Yuqarı Makemesi Meclisniñ qapatılmasınen bağlı davanı muakeme etmege başladı. Mart 3 künü, birinci oturışta davacılar qırımtatarlarnı temsil etken organnıñ faaliyeti ekstremistik ve qanunsız olğanını isbatlağan işke daa qoşma olaraq vesiqalarnı qullanmağa talap etti. Meclis yolbaşçılarnıñ fikirince, büyük ihtimal makeme prokuraturanıñ talabını qabul eter.
OON birleşken milletler teşkilâtı Rusiye Federatsiyasına Qırımdaki qırımtatar Meclisiniñ qapatılmasına izin bermemege çağırdı. Avropa birligi de öz tarafından qırımtatar milliy Meclisiniñ qapatılmasınen bağlı öz qasevetlerini açıqladı.
Qırım aq-uquq qoruma gruppası Halqara cemaatçılıqlarğa milliy Meclisniñ qapatılmasına izin bermemek muracaatınen bulundı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
