Mart 17 künü, Pragada, «CrimeanSOS» festivali çerçivesinde, Karlov universitetiniñ felsefe fakultetinde, qırımtatar milliy Meclisiniñ yolbaşçısı Refat Çubarovnıñ çıqışta bulunuvı ötkerildi.
Meclisniñ reisi ile körüşmek içün, Karlov universitetiniñ ocaları ve studentleri, bunıñnen bir sırada, Çeh Cumhuriyetindeki Ukraina ve Türkiye elçileri teşrif buyurdılar.
Öz çıqışında Refat Çubarov, Qırımnıñ rus işğali hronologiyası aqqında tarif etip, Qırım vaqialarında Rusiye prezidenti Vladimir Pütinniñ oynağan rolini añlattı.
«Cinayetçi, daima cinayet yapılğan yerge kelmege istey. Mart 18 künü Pütin Qırımnı ziyaret etmek niyetinde. Dünya, 20 - nci asırnıñ bir böyle paranoigini bilgen, bu nenen bitkenini de epimiz bilemiz», - dep ayttı Meclis yolbaşçısı.
Mart 18 ve 19 künleri, Pragada «CrimeanSOS» adlı hayriyet festivali ötkerilmekte. Onıñ çerçivesinde teşkilâtçılar Qırımda rus orduları tarafından keçirilgen operatsiyalar aqqında tarif etmek niyetindeler.
Üç künlük festivaliniñ teşkilâtçısı ressam, cemaat faali Anton Litvin oldı, belli ki, keçenlerde o, çeh paytahtında «Kulturus» adlı aktual medeniyetiniñ festivalini keçirgen edi.
Mart 17 künü, «CrimeanSOS» festivaliniñ çerçivesinde, Öleg Sentsov işiniñ vesiqaları boyunca yapılğan «Pomolvka» adlı spektaklniñ premyerası planlaştırıldı. Tarihçı Gülnara Bekirova qırımtatarlarnıñ 1944 senesi sürgün etilmesi boyunca lektsiyanı oquycaq, mart 19 künü ise Mir meydanında qırımtatarlarğa destek köstermek içün, miting ve yürüş ötkerilecek.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
