Mart 18 künü, Aqmescitte, şeher trolleybusleriniñ çalışma saatlerini uzatmağa qarar aldılar. Kreml nezareti astında bulunğan Qırım akimiyetiniñ matbuat hızmeti bildirgenine köre, böyle qarar bayram tedbirlerinden soñ yerli sakinlerini taşımaq maqsadınen alındı. Belli ki, bayram merasimleri Rusiye tarafından işğal etilgen Qırımnıñ 2 yıllığına bağışlanğan.
Trolleybuslerniñ marşrutı ve cedveli Qırım akimiyetiniñ resmiy saytında yerleştirilgen.
Mart 16 künü yarımadada Qırımnıñ yañı statusı ile bağlı olğan, dünyanen tanılmağan referendumnıñ eki yıllığını qayd etip başladılar.
Kiyev şeherinde bu künü Rusiye tecavuzınıñ qurbanlarını añdılar. Amerika Qoşma Ştatlarınıñ devlet departamentinde bildirgenleri kibi, olar 2014 senesi keçirilgen referendumnı qabul etmediler ve etmeycekler, Qırım yarımadası işğalden qurtarılmasına qadar ise, Rusiyege qarşı sanktsiyalarnı toqtatmaycaqlar.
2014 senesi mart - fevral ayında Rusiyeden ve Rusiye Qara deñiz flotınıñ qırım bazalarından keçirilgen belgileri olmağan ordular Qırım yarımadasını işğal etti.
2014 senesi mart 16 künü, Qırımda ve Aqyar şeherinde dünyanen tanılmağan referendum keçirildi. Onıñ neticesinde Rusiye Qırımnı öz terkibine kirsetti. Ne Ukraina, ne Avropa Şurası, ne de Amerika Qoşma Ştatları mezkür saylavnı qabul etti.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
