Link açıqlığı

Mart 18 künü, Aqmescit şeheriniñ Kebir camisinde Reşat Ametovnıñ añına bağışlanğan dua oqılacaq. Bu aqta Rusiye nezareti astında bulunğan Qırım ve Aqyar müslüman diniy idaresiniñ matbuat hızmeti bildirdi.

«Reşat Ametovnıñ facialı ölüminden 2 yıl keçti. 2014 senesi, onıñ cesedi Qarasuvbazar rayonı Ortalan köyüniñ civarında tapılğan edi. Cenazesi 2014 senesiniñ mart 18 künü Aqmescitniñ «Abdal» mezarlığında olıp keçti. Onıñ çağına yetmegen üç balası ve ömür arqadaşı qalğan...Dua merasimi saat 12:20 başlanacaq. Bütün istegenler buyura bileler», - dep aytıla mesacda.

Keçken sene Reşat Ametovnıñ añına bağışlanğan dua merasimi Kebir camisinde ötkerilgen edi.

Mart 16 künü Kiyevde sessiz fleşmob keçirildi. Aynı bu künü 2014 senesi Qırımda sözde referendum ötkerilgen. Onıñ keçirilmesine qarşı çıqqan Reşat Ametov, Aqmescitteki Qırım Nazirler Şurasınıñ binası yanına ukrain bayrağı ile kelgen edi. Bundan soñ faalni tutıp esir ettiler. Bir qaç künden soñ ise, onınıñ cesedi bir çoq qıynav izleri ile tapıldı. Onıñ qatiyi ale daa tapılmadı.

Ukraina Tışqı İşler Nazirliginiñ yolbaşçısı Pavel Klimkin, eki sene evel olğan vaqialarına Qırımnıñ «qırslanması» , - dep ayttı. Türkiye Tışqı İşler Nazirligi 2014 senesi keçirilgen referendumnı takbih etip, yarımadada qırımtatarlarğa qarşı yapılğan siyasiy basqıncılığı devam etkeni aqqında bildirdi. Amerika Qoşma Ştatlarınıñ Devlet Departamenti, Rusiyege qarşı tizilgen sanktsiyalar, yarımadanıñ qaytarılmasına qadar çalışacağı aqqında ilân etti.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG