Qırımtatar milliy Meclisiniñ azaları, Qırım Makemesi yarımadada Meclisniñ faaliyetini yasaq etip, onı ekstremistik kibi tanısa, mahsus fevqulade rejiminde çalışacaq programma boyunca qarar azırladı.
Bu aqta Kiyev şeerinde ötkerilgen matbuat konferentsiya devamında Meclis azası Eskender Bariyev bildirdi, haber ete Qırım.Aqiqat agentligi.
«Şübesiz, Meclis işini toqtatmaycaq. Bu eki afta içinde, biz, eki toplaşuv keçirdik. Meclis azalarınıñ çoqusı işğal etilgen yerde bulunğanları sebebinden, toplaşuvlar onlayn rejiminde keçirilmekte. Bizde bir qaç iş usulı bar, amma olardan bir tanesini seçip aldıq. Qırımtatar milliy Meclisiniñ fevqulade rejiminde çalışacaq qararı azırlandı. Faaliyetniñ konkret usulı, bu ve makeme qararlarına esaslanıp, belgilenecek», - dep ayttı Bariyev.
Onıñ qoşma malümatlarına köre, Mecliste Qırımda yaşağan faallerge yapılğan basqını añlaylar ve «ciddiy areketlerge azırlar».
«Bizim farz etkenimizge köre, repressiyalar olacaq ve Meclisniñ makemesi qırımtatarlarğa qarşı basımnı arttırmaq içün yapılmaqta. Bunı işğal etilgen yerde yaşağan Meclis azaları ve qırımtatarlar yahşı añlay. Onıñ içün, bir de bir qararnı almazdan evel, biz qırımlı işdeşlerimizniñ fikirlerini diñleycekmiz. Bizim tarafımızdan bazı tedbirler tüşünip çıqarılğan. Zanımca, siz eñ yaqın zamanda reaktsiyamız aqqında bilirsiñiz», - dep ayttı Bariyev.
Mart 17 künü, Aqmescitte, yarımadada milliy Meclisniñ faaliyetini yasaq etilmesi boyunca nevbetteki makeme oturışı keçmekte. Bundan evel, Qurultaynıñ Merkeziy İcra Komitetiniñ başı Zair Smedlâyev bildirgeni kibi, Meclis şu işke öz vesiqalarını qoşmağa muracaat etti. Bunıñnen bir sırada oturış devamına, makeme foto ve video levhalarnı yapmağa yasaq etti.
Rusiye nezareti astında bulunğan Qırım prokurorı Natalya Poklonskayanıñ teşebbüsi ile açılğan dava vesiqalarını Meclis menfaatını qoruğan advokatları tek mart 7 künü elde etti. Böyleliknen, 600 - den ziyade saifeli malümatlarnen tanış olmaq içün 3 künden az qalğan edi.
Mart 3 künü, Rusiye nezareti astında bulunğan Qırım Yuqarı Makemesi Meclisniñ qapatılmasınen bağlı davanı muakeme etmege başladı. Birinci oturışta davacılar qırımtatarlarnı temsil etken organnıñ faaliyeti ekstremistik ve qanunsız olğanını isbatlağan işke daa qoşma olaraq vesiqalarnı qullanmağa talap etti. Meclis yolbaşçılarnıñ fikirince, büyük ihtimal makeme prokuraturanıñ talabını qabul eter.
OON birleşken milletler teşkilâtı Rusiye Federatsiyasına Qırımdaki qırımtatar Meclisiniñ qapatılmasına izin bermemege çağırdı. Avropa birligi de öz tarafından qırımtatar milliy Meclisiniñ qapatılmasınen bağlı öz qasevetlerini açıqladı.
Qırım aq-uquq qoruma gruppası Halqara cemaatçılıqlarğa milliy Meclisniñ qapatılmasına izin bermemek muracaatınen bulundı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
