Mart 17 künü, Aqmescitte Meclisniñ faaliyetini yasaq etilmesi boyunca işiniñ makeme oturışı keçirildi. Belli olğanı kibi, makemede, qırımtatar milliy organnıñ menfaatını qoruğan advokatlarnıñ bir sıra itirazları qabul etilmegen. Bu aqta, Kiyev şeerinde ötkerilgen matbuat konferentsiya devamında Meclis azası Eskender Bariyev bildirdi.
«Şimdiki vaqıtqa makeme tenefüs ilân etti. Qoruyıcılar 60 maddeden ibaret itirazlarnı taqdim etti. Baqıluvğa tek 6 tanesi qabul etildi. Prokuratura tarafından 600 saifeli vesiqalar teklif etilgen edi, episi işke qoşulğan», - dep ayttı Bariyev.
Onıñ fikirince, Qırımdaki akimiyet, Meclisniñ faaliyetini, olar öz areketlerinen Rusiyeniñ işğali ile bağlı esas argumentinı yoq etkenleri içün, yasaq etmege istey. Bunıñnen bir sırada, mezkür protsess, yerli şuralarınıñ saylavlarında iştirak etmemege çağırğanları içün, Mecliske qarşı alınğan intiqamdır.
«Menim fikirimce, Qırımtatar Meclisi işğal etici akimiyetinen razı olmağanı içün, olarğa qarşı intiqam almaqtalar. Mecliske alternativa olaraq başqa organ qurıp olamağanları, qırımtatar halqı ise Mecliske ep qol tutqanı içün intiqam alalar. Bu areket, qırımtatar halqınıñ içtimaiy faallerini çıqarması ıntıluvıdır, çünki Meclis aqqında söz yürütilse, er kes üç biñ adam aqqında aytlığanını añlamaq kerek», - dep qayd etti Bariyev.
Mart 17 künü, Aqmescitte, yarımadada milliy Meclisniñ faaliyetini yasaq etilmesi boyunca nevbetteki makeme oturışı keçmekte. Bundan evel, Qurultaynıñ Merkeziy İcra Komitetiniñ başı Zair Smedlâyev bildirgeni kibi, Meclis şu işke öz vesiqalarını qoşmağa muracaat etti. Bunıñnen bir sırada oturış devamına, makeme foto ve video levhalarnı yapmağa yasaq etti.
Mezkür işniñ soñki oturışı mart 10 künü keçirilgen edi. Onıñ devamında Meclisniñ advokatı, berilgen malümatlarnen tanış olıp yetiştirmegeni içün, oturışnı başqa künge keçirmege rica etti. Makeme bu arizanı qabul etti.
Rusiye nezareti astında bulunğan Qırım prokurorı Natalya Poklonskayanıñ teşebbüsi ile açılğan dava vesiqalarını Meclis menfaatını qoruğan advokatları tek mart 7 künü elde etti. Böyleliknen, 600 - den ziyade saifeli malümatlarnen tanış olmaq içün 3 künden az qalğan edi.
Mart 3 künü, birinci oturışta davacılar qırımtatarlarnı temsil etken organnıñ faaliyeti ekstremistik ve qanunsız olğanını isbatlağan işke daa qoşma olaraq vesiqalarnı qullanmağa talap etti. Meclis yolbaşçılarnıñ fikirince, büyük ihtimal makeme prokuraturanıñ talabını qabul eter.
OON birleşken milletler teşkilâtı Rusiye Federatsiyasına Qırımdaki qırımtatar Meclisiniñ qapatılmasına izin bermemege çağırdı. Avropa birligi de öz tarafından qırımtatar milliy Meclisiniñ qapatılmasınen bağlı öz qasevetlerini açıqladı.
Qırım aq-uquq qoruma gruppası Halqara cemaatçılıqlarğa milliy Meclisniñ qapatılmasına izin bermemek muracaatınen bulundı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
