Link açıqlığı

Qırımdaki Makeme Meclisniñ işi boyunca oturışında foto ve video levhalarnı yapmağa yasaq etti


Mart 17 künü, Rusiye nezareti astında bulunğan Qırım Yuqarı Makemesiniñ eyyeti, Qırımtatar milliy Meclisiniñ faaliyetini yasaq etüvi boyunca işiniñ makeme oturışı devamında, foto ve videolevhalarnı yapmağa yasaq etmek qararını aldı. Bu aqta «TASS» adlı rus agentligi bildirmekte.

«Makeme oturışınıñ salonında tertip olması içün, makemeciler foto ve video levhalarnı, radio ve tele yayınlarını qısmen yapmağa razı oldılar. Bularnı makeme qarar çıqarğan vaqıtta yapmaq mümkün olur», - dep izaatlay makemecini agentlik.

Agentlikniñ bergen malümatlarına köre, fotograf ve teleoperatorlar salonda tek işniñ qararı seslendirilgen vaqıtta buluna bileceklerler.

Aqmescitte mart 17 künü, Qırım prokurorı Natalya Poklonskaya tarafından yarımadada Meclisniñ faaliyetini yasaq etmesi boyunca açılğan davanıñ makeme oturışı keçirilmekte.

Rusiye nezareti astında bulunğan Qırım Yuqarı Makemesi, Meclisniñ qapatılmasınen bağlı davanı muakeme etmege başladı. Mart 3 künü, birinci oturışta davacılar qırımtatarlarnı temsil etken organnıñ faaliyeti ekstremistik ve qanunsız olğanını isbatlağan işke daa qoşma olaraq vesiqalarnı qullanmağa talap etti. Meclis yolbaşçılarınıñ fikirince, büyük ihtimal makeme prokuraturanıñ talabını qabul eter.

OON birleşken milletler teşkilâtı, Rusiye Federatsiyasına Qırımdaki qırımtatar Meclisiniñ qapatılmasına izin bermemege çağırdı. Avropa birligi de öz tarafından qırımtatar milliy Meclisiniñ qapatılmasınen bağlı öz qasevetlerini açıqladı.

Qırım aq-uquq qoruma gruppası Halqara cemaatçılıqlarğa milliy Meclisniñ qapatılmasına izin bermemek muracaatınen bulundı.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG