Soñki 1,5 ay devamında ukrain hızmet merkezleriniñ vekilleri, Qırımdan ve Donbasstan ketirilgen şübeli maşnalarnıñ registratsiyadan keçirmek ıntıluvı adiselerini qayd eteler. Bu aqta, Qırım.Aqiqat agentligine intervyü devamında, Ukraina İç İşler Nazirliginiñ baş hızmet merkeziniñ reisi Vladislav Krikliy bildirdi.
Onıñ sözlerine binaen, aynı bu kibi faktlarnı belli etmek içün, Ukraina hızmet merkezlerinde naqliyatnıñ ekspertizası protseduraları ğayrıdan çalışıp başladı. Belli ki, böyle naqliyatnıñ saipleri vesiqalarnıñ coyulması aqqında ariza yazıp, dublikatınıñ bermesini talap etmekteler.
«Bazıda adamlar, vesiqalar coyulğanı aqqında ilân eteler, bizim qaydlarımızğa köre ise, naqliyatnıñ Qırımda başqa saibi olğanı aqqında malümat keçmekte. Naqliyatnıñ mecburiy ekspert teşkerüvi ğayrıdan çalışıp başlağanı pek yahşı oldı, çünki böyleliknen, biz, agregat ve köçüriciniñ sahte nomeralarını teşkerip olamız», - qayd etti Krikliy.
Onıñ bildirgenine köre, naqliyatnıñ ekspert teşkerüvi keçirilgen soñ, Qırımdan ve Donbasstan ketirilgen 100-den ziyade şübeli araba qayd etildi.
«1,5 ay içinde köçürüci ve nomeraları sahte olğan 166-dan ziyade araba teşkerildi. Esasen, olar, Qırımnıñ işğal etilgen yerlerinden, Donetsk ve Lugansk vilâyetlerinden ketirilmekte», - tasdıqladı Ukraina İç İşler Nazirliginiñ baş hızmet merkeziniñ reisi.
Rusiye İç İşler Nazirligi, akimiyet qararına bazı deñişmeler kirsetti. Olarğa köre, qırımlı aydavcılar aprel 1 kününe qadar elde etken arabalarnıñ ukrain türlerini rusiye türlerine deñiştirmek kerek.
Ukraina Nazirler Şurasınıñ iş gruppası, aprel 1- nden soñ esasiy Ukraina boyunca rusiye türleri olğan qırım arabalarınıñ areket etüvinen bağlı meselesini çezmekteler. Amma qarar daa iddia etilmegen, memurlar, çareleri olğanı qadar qırım aydavcılarına arabalarnıñ ukrain vesiqalarını saqlamağa rica eteler. Bu ise, Ukraina hızmet merkezlerinde, ücetiniñ coyulğanı ya da qırslanılğanı sebebinden, ukrain vesiqalarnıñ dublikatı alınmasınen kerçekleşe bile.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
