Mart 16 künü, «Krım v miniatüre na ladoni» adlı parkında, «Nezaketli adamlar» eykeliniñ tantanalı açılışı ötkerildi. Bu tedbir Qırım işğaliniñ ekinci yıllığına bağışlandı. Eykelde elinde mışıqnı tutqan rus askeri kösterilgen.
Parknıñ resmiy saytında belgilengeni kibi, açılış merasiminde parknıñ direktorı Viktor Jilenko ve Bağçasaraynıñ sabıq merı Konstantin Rubanenko iştirak ettiler.
Rubanenkonıñ qayd etkenine köre, eykelini qoydırmaq fikiri eki yıl evel peyda oldı, amma bu ğaye tek şimdi ömürge keçirile bildi.
Belli olğanı kibi, eykel başta şeherniñ özünde tiklenilecek edi, amma buña pek çoq vesiqa ve vaqıt kerek olğanı sebebinden, onı parkta qoydırmaq qararğa keldiler.
Mart 16 künü yarımadada Qırımnıñ yañı statusı ile bağlı olğan, dünyanen tanılmağan referendumnıñ eki yıllığını qayd etip başladılar.
Kiyev şeerinde bu künü Rusiye tecavuzınıñ qurbanlarını añmaqtalar. Amerika Qoşma Ştatlarınıñ devlet departamentinde bildirgenleri kibi, olar 2014 senesi keçirilgen referendumnı qabul etmediler ve etmeycekler, Qırım yarımadası işğalden qurtarılmasına qadar ise, Rusiyege qarşı sanktsiyalarnı toqtatmaycaqlar.
2014 senesi mart - fevral ayında Rusiyeden ve Rusiye Qara deñiz flotınıñ qırım bazalarından keçirilgen belgileri olmağan ordular Qırım yarımadasını işğal etti.
2014 senesi mart 16 künü, Qırımda ve Aqyar şeherinde dünyanen tanılmağan referendum keçirildi. Onıñ neticesinde Rusiye Qırımnı öz terkibine kirsetti. Ne Ukraina, ne Avropa Şurası, ne de Amerika Qoşma Ştatları mezkür saylavnı qabul etti.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
