Link açıqlığı

Türkiye tışqı işler nazirligi yarımadanıñ işğali yıllığına Qırımda insan aq - uquqları bozulğanı aqqında hatırlattı


Qırımda keçirilgen, dünyanen qabul etilmegen referendumnıñ eki yıllıq munasebetinen, Türkiye tışqı işler nazirligi, Rusiye tarafından yarımada işğal etilgen soñ, insanlarnıñ uquqları toqtamayıp bozulğanı aqqında bildirme yaptı.

«2014 senesi mart 16 künü Qırımda keçirilgen referendumnı ve bundan soñ olğan Rusiye tarafından qanunsız işğalini qabul etmegenimiz aqqında kene aytamız. Bu halqara aq-uquqlar qanunınıñ bozulıvıdır», - dep aytıla bildirmede.

Hızmette qayd etkenlerine köre, eki yıl içinde yarımadada insanlarnıñ aqqı vaziyeti ke-kete kerginleşmekte.

«Sakinlerniñ çeşit gruppalarına ve matbuat vastalarına yapılğan separatist siyaseti ve sıqıştırmalar delilleri, delegatsiyalarnıñ maruzalarında yer taptı. Halqara cemaatçılığı olarnı yarımadağa yollap oldı. Üküm sürgen vaziyet bu künge qadar raatsızlıq menbası olaraq qalmaqta. Biz kene de qatiyen, mezkür sıqıştırma siyasetini toqtatmağa çağıramız», - dep qayd etile arizada.

Mecliste, OON ve halqara uquq qoruma teşkilâtlarında daima qırımtatarlarnıñ taqip etilmesi aqqında aytmaqtalar. Bunıñnen bir sırada Rusiye nezareti astında bulunğan Qırım akimiyeti, qırımtatarlarğa qarşı yapılğan taqiplernen bağlı bildirüvlerni «Ğarp ştampları» dep adlandırdılar.

Mart 16 çarşenbe künü Qırımda «referendumnıñ» eki yıllıq munasebetinen bir sıra tantanalı tedbirler keçirilmekte. Kiyevde bu künü Rusiye tecavuzınıñ qurbanlarını añıp, sessiz fleşmob keçirmekteler.

2014 senesi mart 16 künü, Qırım ve Yaqyarda dünyanen qabul etilmegen referendum olıp keçti. Onıñ neticesinde Rusiye Qırım Cumhuriyetini öz terkibine kirsetti. Ne Ukraina, ne Avropa Birligi, ne Amerika Qoşma Ştatları mezkür saylavnı qabul etti.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG