Link açıqlığı

Qırım.Aqiqat agentliginiñ mühbiri bildirgenine köre, Keriç şeherinde elektrikni kene sıq kesmege başladılar.

Energetikler bu söndürmelerini yüz bergen suvuqlarnen bağlamaqtalar. Şeheriniñ öz generatsiyası yeterli olmağanı içün, Keriç oña berilgen limitten çoq elektrikni qullanıp başladı. Qışta elektrikni eñ çoq ayazlar başlağan vaqıtta kese ediler.

Mart 14 kününden başlap Keriç şeherinde ava birden suvudı. Ava arareti 4-5 derece suvuqnı teşkil ete. Salı künü şeherde sılaq qar yağıp başlağan.

Belli olğanı kibi elektrikni künde bir qaç kere keseler. Faqat umumen alğanda, bu al, 3-4 saatten çoq olmay.

Aynıñ başında çoq kiralı evlerde liftlerni çalıştırıp başladılar. Amma fevqulade vaziyetke oğramamaq içün, elektrik kesilecek vaqıtlarda olarnen qullanmamağa rica ettiler. Bunıñnen bir sırada, konkret cedvel yoq, adamlar ise, elektrikniñ söndürülmesini tünevinge baqıp, bekleyler.

Aqyarda, suvuqlar basqan vaqıtlarğa elektrikniñ mahsus qoşma menbalarını azırlağanlar.

Qırımda 2015 senesiniñ noyabr 22 kününden başlap Ukrainadan elektrik berilmesiniñ toqtatılması sebebinden Fevqulade Vaziyet kirsetilgen. Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.

Şimdiki vaqıtta, Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energo köpüriniñ yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.

Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG