Rusiye nezareti astında bulunğan Qırım Yuqarı Makemesi, «fevral 20» adlı işini mart 24 künü baqmağa devam etecek. Bu aqta qırımtatar milliy Meclisi yolbaşçısınıñ muavini Ahtem Çiygoznıñ rusiye advokatı Nikolay Polozov bildirdi.
«Fevral 20» işi boyunca nevbetteki oturış 24.03.16 belgilengen», - dep yazdı o, Twitterde.
Rusiye nezareti astında bulunğan Qırım Yuqarı makemesi, mart 11 künü keçirilgen oturışınıñ neticesinde, «fevral 26» işiniñ mabüsleri Ahtem Çiygoz, Ali Asanovnı ve Mustafa Degermencini apiste aprel 11 kününe qadar qaldırmağa qarar aldılar.
Polozovnıñ sözlerine köre, oturışta iştirak etken Qırım prokurorı, apis müddetini üç ayğa uzatmağa talap etken.
Mezkür oturışta Ahtem Çiygoz makemeniñ bütün eyyyetine çıqarma ilân etken, faqat bu istek qabul olunmadı.
Qırım Rusiye tarafından işğal etilgen soñ, yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksönov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar. Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu işte qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Rusiyede «Memorial» uquq qorçalayıcı merkezi, «fevral 26» işiniñ iştirakçileri, apiste yatqan – Ahtem Çiygoz, Ali Asanovnı ve Mustafa Degermencini siyasiy mabüsler olaraq tanıdı.
Ukraina Yuqarı Şurası, 2014 senesiniñ fevral 20 resmiy olaraq Qırımnıñ ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petro Poroşenko mütenasip qanunnı imzaladı. Halqara teşkilâtlar, Rusiye tarafından Qırımğa qarşı yapılğan işğal areketlerini qanunsız sayıp, onı takbih etti. Ğarp devletleri, Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
