Milliy Meclis vekilleri tarafından tizilecek «Çiygoz cedveli» ne tek Qırım rus akimiyetiniñ vekilleri degil de, olarnıñ aileleri de kirsetilmeli. Bu aqta öz izaatını Qırım.Aqiqatqa rus advokatı Nikolay Polozov bildirdi.
«Bu teşebbüsni tek alğışlamaq mümkün. «Savçenko cedveli», «Çiygoz cedveli»eyi ayattan degil, rus akimiyeti özüleri yazğan insanlar aq-uquqlarınen bağlı qanunlarnı bozğanları içün teşkil oluna»,- dep ayttı Polozov.
Advokatnıñ fikirince, figurantlarnıñ sayısı «yüzlernen» belgilenmek kerek.
«Çiygoz cedveli» ne mıtlaq qırım prokurorları, makemeciler, taqiqatçılar kirmek kerek, bu cinaiy işte yardım etken ve kâğıtnı bergenler de kirsetilmeli. Bu cedvel tar olmaycaq, çünki tek mezkür şahıslarnı degil, olarnıñ aile azalarını da qaplap alacaq, endiden mülk olarnıñ adlarına yazılmasın ve olar Rusiye sıñırından keçmesinler», - dep saya o.
Mart 9 künü qırımtatar milliy Meclisi yolbaşçısı Refat Çubarov «Çiygoz cedveli» ni teşkil etmekte teşebbüsçi olaraq çıqtı.
Rusiyeniñ Qırım işğalinden soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar. Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste yatqan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
