Rusiye nezareti astında bulunğan Qırım Yuqarı Makemesi mart 10 künü Qırım prokuraturası tarafından milliy Meclisniñ faaliyetini yasaq etilmesi boyunca açılğan davanıñ baqılmasını başqa vaqıtqa keçirdi.
Bu aqta Qırım.Aqiqatqa qırımtatar Qurultayı merkeziy icra komitetiniñ reisi Zair Smedlâyev haber etti.
«Advokat dava vesiqalarınen tanış olmağa yetiştirmegeni içün, makeme oturışını başqa vaqıtqa keçirmesinen bağlı ariza yazdı. Anda büyük kölemli iş. Makeme arizanı qabul etti. Makemeniñ nevbetteki oturışı mart 17 künü, 9:30 keçirilecek»,- dep ayttı Smedlâyev.
Oturış arfesinde Meclis yolbaşçısınıñ birinci muavini Nariman Celâl Qırım.Aqiqatqa haber etkeni kibi, olar makemeni, vesiqalarnen tanış olmaq içün dava baqılmasını uzattırmağa rica etecekler.
Rusiye nezareti astında bulunğan Qırım prokurorı Natalya Poklonskayanıñ teşebbüsi ile açılğan dava vesiqalarını Meclis menfaatını qoruğan advokatları tek mart 7 künü elde etti. Böyleliknen, 600 - den ziyade saifeli malümatlarnen tanış olmaq içün 3 künden az qalğan edi.
Rusiye nezareti astında bulunğan Qırım Yuqarı Makemesi Meclisniñ qapatılmasınen bağlı davanı muakeme etmege başladı. Mart 3 künü, birinci oturışta davacılar qırımtatarlarnı temsil etken organnıñ faaliyeti ekstremistik ve qanunsız olğanını isbatlağan işke daa qoşma olaraq vesiqalarnı qullanmağa talap etti. Meclis yolbaşçılarnıñ fikirince, büyük ihtimal makeme prokuraturanıñ talabını qabul eter.
OON birleşken milletler teşkilâtı Rusiye Federatsiyasına Qırımdaki qırımtatar Meclisiniñ qapatılmasına izin bermemege çağırdı. Avropa birligi de öz tarafından qırımtatar milliy Meclisiniñ qapatılmasınen bağlı öz qasevetlerini açıqladı.
Qırım aq-uquq qoruma gruppası Halqara cemaatçılıqlarğa milliy Meclisniñ qapatılmasına izin bermemek muracaatınen bulundı.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
