Rusiye advokatı Nikolay Polozovnıñ bildirgenine köre, Qırımda apis etilgen qırımtatar milliy Meclisi yolbaşçısı muavini Ahtem Çiygoznıñ apishanede bulunma müddeti soñuna keldi.
Amma buña baqmadan, Çiygoz Aqmescit SİZOsında ale daa qalmaqta, qayd ete Polozov.
«Ahtem Çiygoznıñ soñ berüv tedbirlerge köre, 2016 senesiniñ mart 8 kününe qadar apishanede bulunmaq qarar alınğan edi. Bugün martnıñ 9, başqa normal devletlerde Çiygoz çoqtan endi azatlıqta olacaq edi. Bunıñnen bir sırada o, Mustafa Degermenci ve Ali Asanov kibi Aqmescitniñ SİZOsında makeme qararsız qalmaqta», - dep yazdı advokat Feybuk saifesinde.
«Rusiye akimiyeti qırımtatarlarnı reine olaraq tutmağa devam ete. Amma men eminim ki, qanunsız azattan marum etilmesi kibi deşetli bozuvlarnıñ keñiş şekilde muzakere etilmesi, bunıñnen bir sırada YESPÇniñ Çiygoz işi ile bağlı olğan müsbet qararlarınen birlikte, neticede rusiye akimiyetine basqı, Ahtem Çiygoz ve başqa siyasiy reinelerniñ azatlıqqa, adaletke ketirir», - dep qoştı o.
Rusiyeniñ Qırım işğalinden soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahkeme etmege başladılar. Vaqialar 2014 senesi fevral 26-da olıp keçken edi. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.
Fevral 15-te Qırımnıñ Yuqarı mahkemesi bu işni tekrar taqiq etilmesine yollamağa qarar aldı.
Rusiyede «Memorial» uquq qorçalayıcı merkezi «fevral 26 işiniñ» iştirakçileri, apiste yatqan – Ahtem Çiygoz, Ali Asanov ve Mustafa Degermenci siyasiy mabus olaraq tanıdı.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
