Şimdiki vaqıtta Rusiye tarafından işğal etilgen Qırımdaki vaqialar, Nadejda Savçenkoğa qarşı makeme, yarımadada milliy Meclisniñ qapatılma davası - bütün bular «stalinizm yaşağanı» ve o, Rusiye prezidenti Vladimir Pütinnen sıq bağlı olğanını köstere. Bu aqta Ukraina Milliy ilimler akademiyasınıñ Ukraina tarihı institutınıñ ilmiy hadimi Lüdmila Grineviç Qırım.Aqiqat radiosınıñ efirinde bildirdi.
«Bugünki künde stalinizm yaşağanını iqrar etmek kerekmiz. Bağışlañız, amma şimdi biz buña köstergen eki tedbirni elde etemiz. Mart 3 künü (mart 5 künü - Stalinniñ ölüm künü)
Nadâ Savçenkoğa qarşı makeme ketişatı. Er birimiz şimdi onıñ sağ qalması içün Allahqa dua etmekte, çünki quru açlıq bu şaqa degildir. Ve aynı mart 3 künü qırımtatar milliy Meclisniñ qapatılma davasınıñ makeme oturışı. Vaqialarnıñ ekisi de stalin mefküresi, stalin ameli canlı olğanını köstermekte. Şusı meraqlı ki, bu doğrudan - doğru Pütinnen bağlı», - qayd etti mütehassıs.
Grineviçniñ fikirince, «Rusiye devlet maşnası şimdi Stalinni begengenler sayısınıñ çoqlaşmasına yöneltken", onıñ rejimi ise "insan yaşamaq aqqını körmemezlikke urulğanınıñ timsalidir».
İosif Stalinniñ 63 ölüm yıllığı munasebetinen Aqyarnıñ vokzal meydanında kommunistler toplaştı. Tantanalı sürette olar Rusiye nezaret asıtnda bulunğan şeer yolbaşçısı Sergey Menâyloğa regionda sovet yolbaşçısınıñ eykelini qurmaq ricası ile bulundılar.
Aqmescitte belgisiz şahıslar tarafından İosif Stalinniñ memorial tahtasında «Cellât» sözüni yazıp qaldırdılar.
1945 senesi Qırımda ötkerilgen Yalta konferentsiyasında iştirak etken ve yarımadada bu sebepten bulunğan İ. V. Stalinniñ hatırasına memorial tahta yerleştirildi. O, KPRFniñ Qırım cumhuriyet komitetiniñ binası duvarında Dolgorukov soqağı 10 - A adresi boyunca qoyulğan.
Rusiye tarafından işğal etilgen Qırımda qırımtatar milliy Meclisniñ faaliyetini makeme yardımınen yasaq etmege isteyler. Birinci makeme oturışı mart 3 künü keçirildi. Mecliske vesiqalarnen tanış olmaq içün yedi kün berildi. Nevbetteki oturış mart 10 künü ötkerilecek.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
