Link açıqlığı

Saatnıñ esas haberi

Nyü - Yorkta Eskender Bekmambetovnıñ Qırım işğaline bağışlanğan muzıkalı eseri yanğıradı


Qırımtatar muzıkantı ve bestekârı Eskender Bekmambetov telli aletler orkestri içün azırlağan öz süitniñ bir qısmını Qırımnıñ işğal etilmesinen bağlı facialı vaqialarğa bağışlağan. Muzıkalı eser «20 fevral 2014» serlevasını taşıy. O, süitniñ sekizinci qısmını teşkil ete. Tolu eser 10 qısımdan ibaret, - dep ayttı Qırım.Aqiqatqa Eskender Bekmambetov.

Eserniñ taqdimi Nyü - York şeeriniñ Troitsa kilsesiniñ salonında ötkerildi.

Şimdiki vaqtta qırımtatar muzıkantı Kanadada yaşamaqta, onıñ qayd etkenine köre, Qırımda 2014 senesi yüz bergen vaqialar tek deşet ve quvetsizlik duyğularını peyda ete, olarnı muzıkant öz eserinde akis etmege tırıştı.

«Buña tek bir baqış ola bile. İşğal sözünden başqa kelime tapamayım. Duyğularımnı ise eserde akis ettim. Muzıkada kösterilgeni kibi, ilk evelâ bu deşet ve küçsüzlik duyğularıdır», - dep tarif etti Qırım.Aqiqatqa Eskender Bekmambetov.

Onıñ sözlerine binaen, «20 fevral 2014» adlı eser, süitniñ bir qısmı olsa da, ayırı eser kibi de icra etile bile.

«Bu eser Russian String Orchestrası içün yazılğan. Bu orkestrnen meni çoq şey bağlay. Bir vaqıtları men bu örekstrde çalıştım. Menim bir çoq muzıkalı eserlerim, dünyanıñ farqlı sanalarında, bu orkestr tarafından icra etilgen ve ale daa etilmekte. Bu süitni men bütün olıp keçken vaqialardan evel yazıp başladım. «Fevral 20» qısmı süit üzerinde çalışmalar yekünlengende yazıldı. Halqara taqdim merasimi mart 3 künü «Trinity Church» adlı kilsede, Nyü-York şeerinde ötkerildi», - dep añlattı Qırım.Aqiqat mühbirine muzıkant.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG