Kreml nezareti astında bulunğan Aqmescit şeer şurasınıñ kompartiya bölügini temsil etken deputatı Stepan Kiskin Qırım FSB ve prokuraturağa açıq mektüp yazdı. Bu mektüpte Stalinniñ memorial tahtasına yapılğan«Cellât» sözüniñ müeliflerini tapmaq talabı aqqında söz yürütile.
Bu aqta Kiskin öz Facebook saifesinde haber etti. Onıñ sözlerine binaen, yazı mart 5 gecesinden saba 6-na yapılğan.
«İleride böyle adiselerniñ olmaması içün, kerekli tedbirlerni keçirmege rica etem. Bizim vatanımıznıñ vatanperver tarihına vandallar böyle çirkin sürette davranamazlar, Büyük Ğalebeniñ generalissimusınıñ memorial tahtasını aramlamaq mümkün degil», – dep belgilene Kiskinniñ arizasında.
1945 senesi Qırımda ötkerilgen Yalta konferentsiyasında iştirak etken ve yarımadada bu sebepten bulunğan İ. V. Stalinniñ hatırasına memorial tahta yerleştirildi. O, KPRF Qırım cumhuriyet komitetiniñ binası duvarında Dolgorukov soqağı 10-A adresi boyunca qoyulğan.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
