Mart 4 künü Kiyevde qırımtatar muzıkası aqşamı keçirildi. Teşrif buyurğanlarda evel qırımtatarlarnıñ çeşit merasimlerinde yañğırağan milliy muzıkalı aletlerni eşitmege imkân oldı.
«Qırımtatarlarda maneviy muzıka daima inkişaf etken, yırlar, ayneniden başlap soñ yolğa ozğaruvğa qadar, farqlı ayat sebeplerini akis etmek içün, uydırıla edi. Qırımtatarlar Qırımda asırlarnen bar olğan muzıkalı aletlerde çalmağa bile ediler. Amam bu aletler XX asırda yoq olıp başladı. Menim vazifem ise, qırımtatar muzıkasınıñ janrını ve aletlerini ğayrıdan tiklemektir», - dep ayttı qırımtatar muzıkantı, folklorci Cemil Karikov.
Qırımtatar muzıkasına bağışlanğan aqşam devamında folklorci-muzıkant santur, ud, bağlama ve başqa muzıkalı aletlerde çaldı.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
