Rusiye energetika nazirligi Qırımdaki eki elektrostantsiyalarnıñ qurulmasında kerilik tesbit ete, «Tehnopromeksport» buñı iyün 1 kününe qadar yoq etmek kerek, bu aqta jurnalistlerge mart 4 künü Qırımğa işnen kelgen Rusiye energetika nazirliginiñ yolbaşçısı Aleksandr Novak añlattı.
«Leyha işleri yekünlendi, şimdi yer işleri keçirilmekte, temel qoyula, kerekli aletler sıparış etile. Biz kiçkene kerilikni qayd ettik, «Tehnopromeksport» işdeşlerimiznen añlaşqanımızğa köre, olar bu meseleni iyün 1 kününe qadar çezip, kene cedvel boyunca çalışacaqlar, bu ise bizge qoyulğan maqsadlarğa vaqtında irişmege imkân berer», - dep ayttı Novak.
Söz Qırım içün ayırılğan 940 megavat yañı generatsiyası aqqında yürütile. TESni sentâbr 2017 ve mart 2018 senelerinde işletip başlamağa isteyler.
Mezkür stantsiyalar Aqmescit ve Aqyar civarında qurılmaqta.
Qırımda 2015 senesiniñ noyabr 22 kününden başlap Ukrainadan elektrik berilmesiniñ toqtatılması sebebinden Fevqulade Vaziyet kirsetilgen. Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.
Şimdiki vaqıtta, Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energo köpüri yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.
Energo köpürniñ 3 ve 4 ağı kirsetilmesi 2016 senesi mayıs 1 kününe belgilendi.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
