Qırımtatar milliy meclis yolbaşçısı Refat Çubarovnıñ fikirince, Rusiye nezareti astında bulunğan Qırım akimiyeti makeme yarıdımınen yarımadada Meclisniñ faaliyetini toqtatmağa istese bile, insanlarnı toqtatamaz. O, emin ki, evelki olğanı kibi qırımtatar milliy areketinde halqnıñ qol tutuvı olur.
Bu aqta o Qırım.Aqiqat içün berilgen izaatta haber etti.
«Yerli meclisler sayısı 250-den ziyadedir, regional meclisler 22-ni teşkil etmekte. Bular ise qırımtatar halqınen seçilgen biñlerce insanlardır. Olarnı nasıl toqtatırsıñ?Amma añlaşıla ki, biz işğal etici akimiyetiniñ eñ ağır şekillerge bile azırlanamız», - dep ayttı Çubarov
Meclis reisi qayd etkeni kibi, Sovet Birligi zamanında halqqa qarşı yapılğan repressiyalar total edi, amma milliy areket iştirakçısız qalmağan.
«Yarımadadaki qırımtatarlar bir taraftan Meclis qapatılma ıntıluvlarğa açuvlanalar, başqa taraftan ise bu kibi vaqialar halqımıznıñ birlik pekitmesine sebep olacağını añlaylar», - dep izaatlay Çubarov.
Rusiye nezareti astında bulunğan Qırım Yuqarı Makemesi Meclisniñ qapatılmasınen bağlı davanı muakeme etmege başladı. Mart 3 künü, birinci oturışta cavacılar qırımtatarlarnı temsil etken organnıñ faaliyeti ekstremistik ve qanunsız olğanını isbatlağan işke daa qoşma olaraq vesiqalarnı qullanmağa talap etti. Meclis yolbaşçılarnıñ fikirince büyük ihtimal makeme prokuraturanıñ talabını qabul eter.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
