Herson vilâyetiniñ qırımtatar cemiyet vekilleri Rusiye nezareti astında bulunğan Qırım prokurorı Natalya Poklonskaya tarafından milliy Meclisniñ qapatılmasınen bağlı açılğan davanen çorlanmaqtalar.
Herson regional meclis reisi Lenur Lümanov qayd etkeni kibi, uquqiy taraftan hususan qırımtatar milliy Meclisi faaliyetiniñ yasağı ile bağlı, Kreml nezareti astında bulunğan Qırım hızmetleriniñ bir de bir qararlarnı almağa temelleri yoq.
«Poklonskaya kim olğan? Bu nasıl dadalet? Yasaq etmek, izin bermek - bu meselede qarar almaq içün, olar kim olğan?», - dep ayttı Lenur Lümanov Qırım.Aqiqatqa
«Biz Qırım Ukrainağa qaytması içün areket etemiz. Onıñ içün ne Aksönov, ne Konstantinov, ne Poklonskaya bizge mania olamazlar. Biz yavaş, amma eminliknen bu maqsadqa irişmek içün adımlaymız, olar Qırımda Meclisni yasaq etseler bile, iç bir şeyni qazanamaycaqlar. Meclis tamırlarınen sürüp atılmaz», - qayd etti Geniçesk rayonnıñ Sçastlivtsevo köyüniñ yerli meclis muavini Artur İzmaylov.
Qırımtatar cemaatçılığı Meclisniñ qapatılmasınen bağlı qattı izaat berdi.
Mart 3 sabası Qırımda qırımtatar milliy Meclisniñ qapatılmasınen bağlı makemeniñ ilk oturışı keçti. Belli ki Rusiye nezaret astında bulunğan Qırım prokurorı Natalya Poklonskaya mezkür teşkilâtnı yasaq etip, ekstrimistik teşkilâtı olaraq tanımaq işinde davacı olaraq çıqtı. Qırımtatarlarnıñ temsil organında böyle ariza özünde bir sıra uquqiy añlaşılmamazlıqlar taşığanı aqqında aytmaqtalar, böyle dava peyda oluvınıñ siyaset sebepleri bar ve maneviy ceetten olar bu yasaqqa endi azırlanalar.
Rusiye nezaret astında bulunğan Qırım prokuraturası mart 3 künü keçirilgen makeme oturuşında «delil» olaraq 630 saife ve 10 disk malümat teslim etti. Meclis menfaatını qoruğanlarğa vesiqalarnen tanış olmaq içün 7 kün berildi.
Makemeniñ yañı oturışı mart 10 kününe belgilengen.
Qırım uquq qoruyıcı gruppası halqara teşkilâtlarğa Qırımdaki Milliy Meclisniñ qapatılmasına izin bermemek arizası ile muracaatta bulundılar. Mezkür arizada uquq qoruyıcılar halqara teşkilâtlarnı qırımtatarlarğa ve Milliy Mecliske qarşı yapılğan siyaset sebebinden taqip etilmesine yol bermemek ve mümkün olğanı qadar buña tesir etmege çağıralar.
Avropa birligi qırımtatar milliy meclisniñ qapatılmasınen bağlı öz raatsızlıqnı endi bildirdi.
2014 senesiniñ başında Qırım Rusiye tarafından işğal etilgen soñ qırımtatar liderleri Refat Çubarov ve Mustafa Cemilevge yarımadağa 5 yıl devamında kirmege yasaq ettiler.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
