Qırımtatar milliy Meclisiniñ faaliyetini yasaq etmege istegen Rusiye nezaret astında bulunğan Qırım prokurorı Natalya Poklonskayanıñ fikirnce, «mahsus sozğalama» olmasa, makeme Meclis qapatıluvı boyunca işni vaqtında baqacaq.
Bu aqta o, mart 3 künü keçirilgen makemeniñ birinci oturışından soñ Qırım.Aqiqat jurnalistlerine tarif etti.
«Eger cevap bergen taraf bu meseleni enqastan sozğalamasa, elbette makeme grajdanlarnıñ memuriy işleri baqılması içün belgilengen vaqıtta, keregi kibi bu işni baqacaq»,- dep ayttı o.
İşnen tanış olmaq içün advokat eñ az eki afta soradı.
Makemege teslim etilgen vesiqalar arasında Meclisniñ ücet ve bir sıra kâğıtlarnıñ açıq irişimde olğanını qayd etip, Qırım rus prokurorı advokatnıñ istegine qarşı çıqtı.
Qapatılma işinen tanış olmaq içün Meclis advokatlarına bir afta berildi.
Poklonskayanıñ qayd etkenine köre, vesiqalarnıñ çoqusını o makemege mart 2 künü teslim etken. Olarnıñ arasında tahminen 500 saife bar edi. Daa doğru cevap olaraq o vesiqalarnıñ umumiy sayısı 630 saife ve 10 disk teşkil etkenini ayttı.
Mart 3 sabası Qırımda qırımtatar milliy Meclisniñ qapatılmasınen bağlı makemeniñ ilk oturışı keçti. Belli ki Rusiye nezaret astında bulunğan Qırım prokurorı Natalya Poklonskaya mezkür teşkilâtnı yasaq etip, ekstrimistik teşkilâtı olaraq tanımaq işinde davacı olaraq çıqtı.
Mecliske qol tutmaq içün makemege yüzden ziyade insan teşrif buyurdı. Makeme binasında Meclis yolbaşçısınıñ birinci muavini Nariman Celâl, Meclis azası Emine Avamileva ve advokat Cemil Temişev bulundılar. Cemaatçılıqqa makeme salonına kirmege yasaq etildi.
Yañı oturuş mart 10 kününe tayinlengen.
Qırımtatar milliy Meclisinde böyle davanıñ peyda oluvını siyasiy sebeplernen bağlaylar.
Qırım uquq qoruyıcı gruppası halqara teşkilâtlarğa Qırımdaki Milliy Meclisniñ qapatılmasına izin bermemek arizası ile muracaatta bulundılar.
Avropa birligi qırımtatar milliy meclisniñ qapatılmasınen bağlı öz raatsızlıqnı endi bildirdi.
2014 senesiniñ başında Qırım Rusiye tarafından işğal etilgen soñ qırımtatar liderleri Refat Çubarov ve Mustafa Cemilevge yarımadağa 5 yıl devamında kirmege yasaq ettiler2014 senesiniñ başında Qırım Rusiye tarafından işğal etilgen soñ qırımtatar liderleri Refat Çubarov ve Mustafa Cemilevge yarımadağa 5 yıl devamında kirmege yasaq ettiler. Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
