Link açıqlığı

Cemilev studentlerge Qırımnıñ qaytarılması neticesinde peyda olacaq milliy - territorial cumhuriyeti aqqında tarif etti


Qırımtatarlarnıñ milliy lideri, Ukraina halq deputatı, qırımtatar halqınıñ işleri boyunca Ukraina prezidentiniñ vekili Mustafa Cemilev Kiyevdeki Halqara munasebetler institutında ötkerilgen açıq lektsiya devamında, studentlerge Qırım qaytarılğan soñ, yarımadada milliy - territorial cumhuriyeti olacağı aqqında tarif etti.

Bu aqta Cemilevniñ matbuat - hızmeti bildirmekte.

«II Cihan cenkinden soñ, sürgün yerlerinde peyda olğan qırımtatar milliy areketi eki esas talapnı qorçalay edi: bütün qırımtatar halqını tarihiy vetanına qaytarmaq ve sürgünlikten evel olğan her şeyni, milliy - territorial cumhuriyetini de ğayrıdan qurmaqtır», - dep ayttı Cemilev.

Onıñ sözlerine binaen, Ukraina Qırımda milliy-territorial cumhuriyetiniñ qaytarılması añlavına keldi.

«Amma qırımtatarlar, başqalarğa nisbetten, tek qırımtatar olğanları içün, daa çoq aqqa nail fikiri yañlıştır. Biz özümiz buña kesen-kes qarşımız. Amma bizim fikirimizce, bu cumhuriyette tamır halqnıñ aq qoruma mehanizmi temel olaraq qoyulmaq kerek. Yani tamır halqı kimsege öz isteklerini yaptırmaycaq, amma öz aq-uquqlarını saqlamaqta imkân saipleri olacaqlar», - dep añlattı Cemilev.

Hususan, Cemilevniñ sözlerine köre, tamır halqnıñ esas istegi qırımtatar tiliniñ devlet seviyede qullanması ve akimiyetiniñ bütün yönelişinde tamır halqınıñ temsilcilikke nail olmasıdır.

Salı künü, martnıñ 1-de, Kiyevdeki Halqara munasebetler institutında Qırımda apis etilgen qırımtatar meclisiniñ birinci muavini Ahtem Çiygozğa bağışlanğan açıq lektsiya ötkerildi.

Qırımtatarlarnıñ liderleri Mustafa Cemilev ve Refat Çubarov studentler ögünde çıqışta bulunıp, 2014 senesi fevral 26 künü olıp keçken vaqialarnıñ hatırlavlarınen paylaştılar.

Körüşüv devamında studentler Mustafa Cemilev ve Refat Çubarovğa yarımadanı işğal etilmesine ketirgen vaqialar ve Qırımnıñ Ukrainağa qaytarılmasınen bağlı sualler berdiler.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG