Link açıqlığı

Qırım sakinleri halqara Rusiyeniñ ordusında hızmet etmemek içün halqara uquqnı qullana bileler. Celpnameni alğanlarğa ise uquq qoruyıcılar bunı «çağırtma zorlaması» delili kibi qayd etmege tevsiye eteler.

Bu aqta saba yayında Qırım.Aqiqat radiosına Qırım uquq qoruma gruppasınıñ yolbaşçısı Ölga Skripnik bildirdi.

Onıñ aytqanına köre, Rusiye nevbetteki sefer Qırımda orduğa çağıruvnı keçirip, halqara uquq qaidelerni bozmaqta.

«Qırımdaki kibi üküm sürgen şaraitlerde çağıruv meselelerine cevap olaraq temelli vesiqalardan biri - Jeneva konventsiyasınıñ 51- nci maddesidir. Anda yazılğanı kibi, işğal etilgen yerde, işğal etken devlette, öz ordusına çağırmağa aqqı yoq. Propaganda ve öz isteginen yapılğanğa bile sıqıştırmanıñ yapılması yasaq etile» - dep añlattı Skripnik.

Yayınnıñ başqa musafiri «Sankt - Peterburgnıñ askerler anaları» adlı uquq qoruyıcı teşkilâtnıñ matbuat kâtibi Aleksandar Peredruk aytqanı kibi, qırımda yaşağanlarğa böyle celpname kelgen ve olar rus ordusında hızmet etmege istemegenler, alternativ hızmetni seçmege teklif ete. Bunı yapmaq içün celp etilgen arbiy komissariyatqa ariza yazmaq kerek.

«Ariza celp etken komissiyanıñ adına yazılacaq, arizacı böyle-böyle insan, askerlikke celp etilgen, şimdiki vaqıtta qatiy işanç sebebinden alternativ hızmetnen bağlı öz aqqını ömürge keçirmek istey» - dep añlattı Peredruk.

Uquq qoruyıcınıñ sözlerine binaen, sebep olaraq siyasiy, diniy ya da başqa meseleler ola bile.

Keçken seneden başlap Rusiya qırım sakinlerini öz ordusına celp etmege başladı. Voyenkomatqa kelmegenlernii cezanen qurqutalar.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG