Link açıqlığı

Ukraina haber nazirligi satellit yayınlamanıñ operatorlerine ATR telekanalını borclar sebebinden söndürmemege rica ete


Ukraina haber siyaseti nazirligi «SES ASTRA AB» (İsveçiya) adlı satellit yayınlama hızmeti boyunca şirketke «Atlant - SV» niñ olğan borc mecburiyetiniñ vaqıtını biraz uzatmaq ve uyduda ATR qırımtatar telekanalınıñ yayınlamasını qaldırmaq ricası ile mektüp yollamaq niyetinde.

Bu aqta ukrain nazirliginiñ arizasında bildirile.

Matbuat hızmeti bergen malümatlarğa binaen, peyda olğan borclar sebebinden ATR telekanalınıñ uyduda yayınlaması toqtatıla bile.

«Nazirlik ATRge olğan qol tutuvını ilân ete ve er kesni, «SES ASTRA AB»(İsveçiya) şirketini de qırımtatar telekanalınıñ qapatılmasına ketire bilecek qarar ve areketlerden saqınmağa ve izin bermemege çağıra»- dep yazıla mesacda.

Bunıñnen bir sırada nazirlikte qayd eteler ki, ATRniñ borcları belki de Ukraina devlet bücetinden ödenecek.

«Ukraina haber siyaseti nazirligi ATR telekanalınıñ borclarını qapatmaq kibi mevzunı eñ yaqın toplaşuvda muzakere etmek ve qarar almaq niyetinde. İhtimal alda, borcnı qapatmaq içün, devlet bücetinde Qırım probleminiñ çezilmesine ayırılğan para işletilecek.»- dep añlatıla arizada.

Bunıñnen bir sırada, nazirlikte hatırlatqanları kibi, 2016 senesi içün, Ukraina devlet bücetinde qırımtatar milliy meclisiniñ temin etilüvine 60 mln. grn ayırıldı, onıñ bir qısmını da qırımtatar matbuat vastalarına tarqatmağa planlaştırıla.

Keçenlerde ATR qırımtatar telekanalı maliyeviy yardım aqqında muracaat yerleştirdi.

Aprel 1 kününden başlap ATR rus litsenziyasını alıp olamağanı içün, yarımadada öz muqayese yayınlamasını toqtattı. Soñra ATR telekanalı öz işini qıtalı Ukrainadan ğayrıdan başladı.

Telekanalnıñ saibi Lenur İslâmov şimdiki vaqıtta Ukrainada yaşamaqta ve sentâbr 20 künü başlağan bugünki künge qadar Qırım qamaçavı boyunca grajdanlıq aktsiyasında baş teşebbüsçilerden biri olmaqta.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeheriniñ işğali künü olaraq ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi»kibi baqa.

XS
SM
MD
LG