Link açıqlığı

Elektrik energiyasınıñ limiti qısqartılğanı içün, Aqyar şeerinde bir künge trolleybuslerniñ areketi toqtatıldı.

Bu aqta Qırım.Aqiqat mühbirine trolleybus müessiseniñ hadimleri bildirdiler.

Olarnıñ qaydlarına köre, nakliyatnıñ areketi mart 2 künü ğayrıdan başlanacaq, yolaqqa ise 35 arabanıñ çıqması beklenile.

Qıtalı Ukraina Qırım içün elektrik energiyasını kesmeden evel, Aqyar marşrutına her kün 90-dan ziyade trolleybus çıqa edi. 2015 senesiniñ noyabr ayından başlap trolleybusler iç çalışmadı, yanvar ayında şeherge energiyanıñ qısmen berilmesinden soñ, yolaqtaki naqliyatnıñ sayısını 35 qadar qısqarttılar.

Elektrik energiyasınıñ yetişmemezlik sebebinden, şimdiki vaqıtta Aqyarda dört trolleybus marşrutı çalışmay.

Bu aftanıñ başından Rusiye nezaret astında bulunğan Qırım şeher memuriyetleri Kubandan Qırımğa keçirilecek üçünci energo köpürniñ keçirilmesi sebebinden, yaqarlıqnı iqtisat etmek kerkligi aqqında bildirdiler.

Dekabr 30 künü Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.

Şimdiki vaqıtta, Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energo köpüri yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.Sakinlerniñ çoqusı regionlarğa köre adaletsizli üleştirüvğa şikâyet etmekteler.

Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen belgiledi. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkar etip, buña «tarihiy adaletniñ ğayrıdan tiklemesi» kibi baqa.

XS
SM
MD
LG