Qırımtatar Milliy Meclisiniñ qapatılma işinen bağlı makeme oturuşında davacı olaraq şahsen Rusiye prokurorı Natalya Poklonskaya olacaq. Bu aqta o RİA Krım agentligine bildirdi.
«Makemede özüm arizacı tarafını taqdim etecem. Cevap berecek qaydsız meclisi yolbaşçınıñ birinci muavini Nariman Celâlov olacaq, o ise Qırımdaki mezkür teşkilâtnıñ menfaatını qorumaqta» - dep bildirdi Poklonskaya.
Onıñ qaydlarına köre, Meclis aşırıcı teşkilât olğanı ve Rusiyede onıñ yasaq etilmesinen bağlı bütün malümatlar toplanıldı ve Rusiye nezaret astında bulunğan Qırım Yuqarı Makemesine mart 3 künü teslim etilecek.
Rusiye nezaretinde olğan Qırım prokurorı Natalya Poklonskaya Qırımtatar Milliy Meclisni yasaq etip, onı aşırıcı olaraq qabul etmesinen bağlı mahkemege ariza yazdı.
Qırımtatarlarnıñ temsil organında böyle ariza özünde bir sıra uquqiy añlaşılmamazlıqlar taşığanı aqqında aytmaqtalar, böyle dava peyda oluvınıñ siyaset sebepleri bar ve maneviy ceetten olar bu yasaqqa endi azırlanalar.
Qırım uquq qoruyıcı gruppası halqara teşkilâtlarğa Qırımdaki Milliy Meclisniñ qapatılmasına izin bermemek arizası ile muracaatta bulundılar. Mezkür arizada uquq qoruyıcılar halqara teşkilâtlarnı qırımtatarlarğa ve Milliy Mecliske qarşı yapılğan siyaset sebebinden taqip etilmesine yol bermemek ve mümkün olğanı qadar buña tesir etmege çağıralar.
Avropa birligi qırımtatar milliy meclisniñ qapatılmasınen bağlı öz raatsızlıqnı endi bildirdi.
2014 senesi Rusiye tarafından Qırım işğal etilgen soñ qırımtatarlarnıñ liderleri Refat Çubarov ve Mustafa Cemilevge yarımadağa kelmelerini beş yılğa yasaq ettiler. Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini inkâr etip, buña «tarihiy adaletniñ ğayrıdan tiklemesi» kibi baqa.
