Avanıñ ısınmasına baqmadan, yarıqnı Keriç şeerinde daa sıq söndürmege başladılar. Yerli sakinlerniñ qayd etkenlerine köre, soñki bir qaç kün devamında elektrik energiyası büyük ara ile berilmekte: «künde üç kere söndüreler, bunıñnen bir sırada aqşam daa bir qaç kere» - dep bildirdi Qırım. Aqiqatnıñmuhbiri.
«Bazar künü, aqşam aman - aman er saat kesile edi. Bazar ertesi de aqşam devamında eki kere, birinci kere bir saatke, ekinci - üç saatke söndürdiler. Elbette, saba ve kündüz de yarıq yoq edi», – dep ayttı yerli sakinlerniñ biri.
Şeer akimiyeti böyle söndürüvlerni Kubandan Qırımğa yapılacaq energo köpürniñ işlerinen ve üçünci ağnıñ işletüvniñ başlamasınen bağlamaqta. Keriçniñ baş energetigi Aleksandr Zabelinniñ bildirgenine köre, «Şart olaraq ekinci ağnı birincisinde çalışmaq mümkün olsun dep söndürdiler». Onıñ qaydlarına nisbetten, Qırımğa elektrik energiyasınıñ berilmesi 120 mVtqa kesildi, Keriçte - sekizge, evelki qullanması - 44 mVt edi.
Fevqulade vaziyetler boyunca Keriç bölüginiñ toplaşuvında Zabelin vaziyetni böyle açıqladı: «energokopürnen işler eki künge planlaştırıldı, anda ise nasıl olur». Bunıñnen bir sırada bu kibi söndürüvler ileride de ola bile. Şeer akimiyeti yerli sakinlerni sabır etmege rica eteler, «şeerni yarıqtan ne qadar sıq kesseler, o qadar tez energopokürniñ işletilmesi başlar» - dep.
İçtimaiy kerginlikten qaçınmaq içün energetikler «toqunmaz» ve yarıq pek siyrek kesilgen evlerde de özüleri yarıqnı söndürmege başladılar.
Energetiklerniñ işandırmalarına köre, yigirmi dört saat içinde Keriç 20 saat yarıqnı almaqta. Elektrik energiyanen şeerni yel ve küneş generatsiyası temin ete.
Keçmiş raatlıq künleri ve fevral 29 sabası Rusiye nezaret astında bulunğan Qırımnıñ şeyer memuriyetlerniñ resmiy saytlarında haber etilgeni kibi, yarımadada elektrik energiyasınıñ sıñırlanması Kubandan Qırımğa nevbetteki energokopürniñ ağ kirsetilmesinen bağlı.
Bazar künü Qırımnıñ bir qaç şeerinde qaza sebebinden yarıqtan kesilüvler olıp keçti.
Dekabr 30 künü Herson vilâyetinde yerleştirilgen elektrotayamanıñ ihtimal patlavı sebebinden Ukrainadan Qırımğa elektrik energiyasınıñ kelmesi toqtatıldı. Şimdiki vaqıtta Qırımğa 250 megavat bergen elektrik keçirme ağı tamir etilgen, lâkin yarımadağa onıñ temin etilmesi añlaşma bitkeni içün berilmey.
Şimdiki vaqıtta, Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energo köpüri yardımı ile teminlene. Köpür böyle yükke dayanamay, bundan sebep sıq olğan qazalar yüz bermekte.Sakinlerniñ çoqusı regionlarğa köre adaletsizli üleştirüvğa şikâyet etmekteler.
Ukraina Yuqarı Şurası 2014 senesiniñ 20 fevralni resmiy olaraq Qırım ve Aqyar şeeriniñ işğali kününen ilân etti. Oktâbr 7 künü 2015 senesinde Ukraina prezidenti Petr Poroşenko mütenasip qanunnı imza etti. Halqara teşkilâtlar Rusiye tarafından Qırımğa qarşı yapılğan işğal areketlerni qanunsız sayıp, onı takbih etti. Ğarp devletleri Rusiye içün bir sıra iqtisadiy sanktsiyalarnı ömürge keçirdi. Rusiye öz tarafından yarımadanıñ işğalini red etip, buña «tarihiy adaletniñ ğayrıdan tiklemesi» kibi baqa.
