Ukrain siyasetşınası Taras Berezovets Qırım işğali – diqqatnen tüşünilgen bir plan olğanını tüşüne, çünki, aytqanı kibi, «böyle areketlerni azırlamaq içün eñ azından altı ay lâzim». Bu kibi fikirni «İşğal: Qırım adası» kitabınıñ müellifi Taras Berezovets Qırım.Aqiqat Radiosınıñ efirinde bildirdi.
«Arbiy baqıştan, Qırım kibi obyektniñ zaptını azırlamaq içün, eñ azından, altı ay kerek. 2010 senesi Yanukoviç tarafından «Harkov añlaşmaları» imzalanılğanı aqqında aytmaymız, – esası ne olğanını hatırlañız. (Qırımda – QA) Rusiye (arbiy – QA) yedeginiñ 35 biñge qadar arttırılması… Ameliyat evelden azırlanılğan edi. Çünki liberal prezident Yeltsin vaqtında bile rusiyeliler buña azırlıq köre edi, planları böyle edi. 1993 senesini hatırlatayıq, o vaqıt Rusiye Yuqarı Şurası Aqyar şeeriniñ Rusiye şeeri olaraq ilân etilmesine rey bergen edi», – dey Berezovets.
Ukrain siyasetşınası dey ki, Rusiye Qırm işğalinden evel ukrain arbiylerini öz tarafına çeke edi – yüksek unvan arbiyleri, zabtlerni ve adiy askerlerni.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
