Rusiye akimiyeti tayin etken Qırımnıñ şimdiki yolbaşçısı Sergey Aksenov Qırım Muhtar Cumhuriyetiniñ Yuqarı Radası yanında 2014 senesi fevral 26-da olıp keçken adise-vaqialarnı ve Ukraina topraq bütünliginiñ tarafdarlarınıñ mitingine «Rus Birliginiñ» ketkeniniñ sebeplerini añlattı.
«Eki yıl evelsi bu zor bir künni yahşı hatırlayım. Fevral 26-da saba bir de bir agressiv areketler ve Qırım parlamenti binasınıñ zapt etilmesini beklemey edik. Mitingge kelgen qırımtatarlarnen laf ettim, bir çoqu ne içün kelgenini ve ne olğanını añlamay edi», – dep yazdı Aksenov Facebookta.
Onıñ aytqanına köre, Ukrainanıñ diger regionlarından kelgen «Pravıy sektor» milletçilerinden sebep «Rus Birligi» ve lâqayt qalmağan qırımlılar toplaşmağa mecbur oldı».
«Qırımlılar – rus, qırımtatarlar, ve diger milletlerniñ vekilleri – o zor fevral künlerinde sabırlı olmasa ediler, qurbanlar daa çoq olur edi. Qırım tarihı ise, belki de, diger yoldan – facialı bir yoldan keter edi», – dep tüşüne Aksenov.
2014 senesi fevral 26-da Qırım Muhtar Cumhuriyeti Yuqarı Radası yanında Ukrainanıñ topraq bütünliginiñ tarafdarları ve olarğa qarşı çıqqan Qırımnıñ şimdiki yolbaşçısı Sergey Aksenov reberliginde «Rus birligi» firqası faalleriniñ mitingi olıp keçti. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.
Ukrainada fevral 26-27 künleri Qırım Muhtar Cumhuriyeti işğaliniñ ekinci yıllığına bağışlanğan tedbirler keçirilmekte. «Qırım – Ukrainadır!» haber-bağ kampaniyası devam ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
