Link açıqlığı

Cuma künü bir sıra ukrain mektebinde Rusiye işğaline qarşı çıquv kününe bağışlanğan açıq ders keçirildi. Qırım.Aqiqat mühbiri bildirgeni kibi, Kiyvniñ №165 mektebinde böyle bir ders olıp keçti.

Büyük sınıflarnıñ talebeleri Qırım tarihı aqqında söz yürsettiler, qırımtatar erbabı, maarifçi ve siyasetçi İsmail Gasprinskiyniñ şiirlerini oqudılar.

Mektepni Qırımtatar Milliy Meclisiniñ azaları ziyaret etip, Taras Şevçenkonıñ şiirlerini oqudı.

«Qırım işğal altında, amma küreş devam ete. Adalet içün küreşemiz... Epimiz küreşmek kerekmiz, er kes öz seviyesinde, siziñ seviyeñiz, siziñ vazifeñiz – oqumaqtır», – dep muracaat etti talebelerge Qırımtatar halqınıñ aq-uquqlarını qorçalav komitetiniñ koordinatorı, Meclis reisi Eskender Bariyev.

Ders subet şeklinde keçirildi, Qırımdan köçip kelgenlernen beraber Kyivli talebe, ana babaları ve ocalar Qırımda işğalge nasıl qarşı çıqqanını tarif ettiler.

Ukraina tasil ve ilim nazirligi memleketniñ oquv yurtlarına resmiy mektüp yollap, Rusiyeniñ Qırım işğaliniñ ekinci yıllığı munasebetinen bu mevzuda ders keçirilmesini tevsiye etken edi. Bunıñ içün usul tevsiyeleri cıyıntığı azırlanğan edi.

2014 senesi fevral 26-da Qırım Muhtar Cumhuriyeti Yuqarı Radası yanında Ukrainanıñ topraq bütünliginiñ tarafdarları ve olarğa qarşı çıqqan Qırımnıñ şimdiki yolbaşçısı Sergey Aksenov reberliginde «Rus birligi» firqası faalleriniñ mitingi olıp keçti. Rusiye taqiqatınıñ malümatına köre, yüz bergen çatışmada eki insan elâk oldı, 79 kişi zarar kördi. Aqmescit SİZOsında yatqan Ahtem Çiygoz da bu iş ile qabaatlana. Mahkümler qabaatını tanımayıp, iş siyasiy sebeplerden açılğanını tüşüneler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG