Qırımnıñ vatandaş qamaçavı aktsiyasınıñ iştirakçilerinden ibaret «Asker» vatandaş birleşmesi al-azırda resmiy şekilde qayd ola, Herson vilâyetiniñ Geniçesk, Kalançak ve Çaplınka rayonlarını politsiyanen beraber nezaret etmege azırlana.
Bunı aktsiya ştabınıñ yolbaşçısı Lenur İslâmov Qırım.Aqiqatqa bildirdi.
«Ekstremizm ve separatizm ile küreş degil, hırsızlıq, insanlarnıñ mal-mülkini tutıp aluvğa qarşı bir küreştir. Bu rayonlarda politsiyanen beraber havfsızlıq ceetinden çalışılacaq, anda tertip-nizam olmaq kerek. Belki de, bunıñ kibi rayonlarda politsiya az, bu sebepten biz yardım etecekmiz», – dedi İslâmov.
Onıñ aytqanına köre, bu planlar yerli politsiyanen muzakere etildi. Şimdi faaller sıñırcılarnen talim keçire, soñra politsiya hadimlerinen ögrenecekler.
Geniçesk politsiyasınıñ yolbaşçısı Andrey Leşçenko Qırım.Aqiqatqa mezküp planlarnı tasdıqladı. «Böyle bir şey bütün Ukrainada bar. Adamlar politsiyağa tertip-nizamnı baqmağa yardım eteler. Buña qoltutmaq kerekmiz», – dep ayttı Leşçenko.
Onıñ qayd etkenine köre, faaller birleşmeni qayd etmek kerek ve bütün «uquq meseleleri» al etilmek kerek.
«Rayonda politsiyanen beraber hızmet etken ilk vatandaş birleşmesi degildir. «Hort» birleşmemiz bar, onıñ temsilcileri hadimlerimiznen beraber Novoalekseyevkada tertip-nizamnı baqalar», – dep qoştı o.
Malüm ki, «Asker» vatandaş birleşmesiniñ faalleri «Kalançak», «Çaplınka» ve «Çongar» kiriş noqtalarında nevbetçilik yapacaq üç taqımğa bölünecek.
Faallerniñ aytqanına köre, olar göñülli olıp, aylıq almaycaqlar. Amma urba Türkiyeden hayriye yardım olaraq keldi.
2014 senesiniñ başında Rusiye Qırımnı işğal etken soñ qıtaiy Ukraina ve yarımada arasında memuriy sıñır, amma asılında – tam bir sıñır peyda oldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
