Kyiv ve Kyiv vilâyetiniñ tibbiy müessiselerinde cemaat teşkilâtları ve sağlıq saqlav departamenti köçip kelgenlerniñ tibbiy hızmetlerden haberdar olıp-olmağanını teşkerecekler.
Bunı «Qırım uquq qorçalayıcı teşebbüsi» cemaat teşkilâtınıñ idare reisi Lüdmila Skvortsova Qırım.Aqiqatqa bildirdi.
Böyle bir qarar Kyivde fevral 23-te olıp keçken «Memleket içinde köçip kelgenlerniñ sağlıq saqlav aqqını temin etüv» tögerek masasında qabul etildi.
«Tögerek masanıñ teşebbüsçisleri Sağlıqs aqlav departamentinen beraber memleket içinde vaqtınca köçip kelgenlerge tibbiy yardım körüv esaslarını añlatmaq içün haber kampaniyasını keçirmege qarar aldılar. Kyivniñ sağlıq saqlav müessiselerinde «köçip kelgenler içün yol tarifi» levhalarınıñ bulunması teşkerilecektir», – dep añlattı teşebbüsni Skvortsova.
Tögerek masa çerçivesinde «Memleket içinde köçip kelgenlerniñ saqlıq saqlav aqqı nasıl temin etildi» monitoringiniñ neticeleri taqdim etildi. Onıñ neticesinde köçip kelgenler içün sağlıq saqlav saasında bir sıra problem olğanı ögrenildi.
Monitoring 2015 senesi iyül ayından 2016 senesi yanvar ayına qadar Kyiv ve Kyiv vilâyetinde köçip kelgenler, ekim ve tibbiy müessiselerniñ reberleri ile subetlerge esaslanıp keçirildi. Kyivde köçip kelgen 123 566 insan qayd etildi: 95060 qoranta, olardan 22622 – bala ve 4054 – saqattır.
Ukrainanıñ fevqulâde vaziyetler hızmetiniñ malümatına köre, fevral 23-ke qadar vaqtınca işğal etilgen Qırım ve arbiy areketler keçirilge Donbasstan Ukrainanıñ diger regionlarına 1 mln 28 biñ 808 insan köçip keldi, şu cümleden, Qırım Muhtar Cumhuriyeti ve Aqyar şeerinden – 21 biñ 893 kişi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
